काठमाडौं । नेपाली राष्ट्रिय महिला भलिबल टिमकी कप्तान अरुणा शाहीले एसियन सेन्ट्रल जोन पुरुष तथा महिला भलिबल प्रतियोगितामा उपाधि जित्ने लक्ष्य रहेको बताएकी छिन् ।
सेन्ट्रल जोनको प्रशिक्षणअघि आइतबार संचारकर्मीसँग कुरा गर्दै कप्तान अरुणाले टिमको लक्ष्य उपाधि जित्ने रहेको बताएकी हुन् ।
'अहिलेसम्म कुन कुन टिम आउछ त्यो पक्का भएको छैन । तर, हाम्रो लक्ष्य भनेको स्वर्ण पदक जित्ने नै हो,' कप्तान अरुणाले भनिन्, 'तर, टिम कुन कुन आउछ थाहा छैन । टिम तय भएपछि त्यहि अनुसार तयारी हुन्छ ।'
सेन्ट्रल जोन बंगलादेशको ढाकामा आगामी डिसेम्बर २१ देखि २९ सम्म हुनेछ ।
सेन्ट्रल जोनमा नेपाल साविक विजेता समेत हो । नेपाली महिला टोलीले २०१९ को उपाधि जितेको थियो ।
प्रतियोगिताका लागि नेपाली टोलीले आइतबारबाट तयारी थालेको छ ।
त्रिपुरेश्वरस्थित राखेप कभर्ड हलमा सुरु प्रशिक्षणका लागि नेपाल भलिबल संघले २० खेलाडीलाई बोलाएको छ । महिला टोलीको प्रशिक्षकमा जगदिश भट्ट रहेका छन् ।
यस्तै अरुणाले लामो समयपछि देशको लागि खेल्न पाउदा खुशी लागेको बताईन् ।
'डेढ महिना भयो खेलेको छैनौँ । चाडबाडले गर्दा खेलेको छैनौँ । अबको ४०-४१ दिनमा त्यसलाई पूर्ति गर्नु पर्छ । सेन्ट्रल जोन खेल्ने भन्दा भन्दै एक महिना ट्रेनिङ गरेर अन्तिममा भएन । त्यसले दुख लागेको थियो । अहिले बंगलादेशले खेल गराउने भएपछि खुशी लागेको छ । राष्ट्रको प्रतिनिधि गरेर खेल्न जादा खुशी छौँ । राम्रो गर्नुपर्छ भन्ने लागेको छ,' उनले भनिन् ।
