काठमाडौं । नेपाल भलिबल संघको आयोजनामा जारी छैटौं संस्करणको एनभीए महिला तथा पुरुष क्लब भलिबल च्याम्पियनसिपको फाइनल खेलहरु आज शनिबार हुँदैछ ।
त्रिपुरेश्वरस्थित राखेप कभर्डहलमा पुरुषतर्फको फाइनलमा त्रिभुवन आर्मी क्लब र हेल्प नेपालबीच प्रतिस्पर्धा हुनेछ ।
विभागीय टिम आर्मी र साविक विजेता हेल्प नेपालबीचको फाइनल खेल दिउँसो ३ बजे सुरु हुनेछ । दुबै टिम उपाधि जित्ने योजनामा रहेका छन् ।
पुरुषतर्फको तेस्रो स्थानको लागि नेपाल पुलिस क्लब र एपीएफ क्लब प्रतिस्पर्धा गर्ने छन् । पुलिस र एपीएफको खेल बिहान ११ बजे सुरु हुनेछ ।
यस्तै महिलातर्फको उपाधिका लागि एपीएफ क्लब र न्यु डायमन्ड स्पोर्ट्स क्लबबीच प्रतिस्पर्धा हुनेछ। एपीएफ र न्यु डायमन्डबीचको खेल १ बजे सुरु हुनेछ ।
यस्तै महिलाको तेस्रो स्थानको नेपाल पुलिस क्लब र त्रिभुवन आर्मीबीच प्रतिस्पर्धा हुनेछ । उक्त खेल बिहान ९ बजे सुरु हुनेछ ।
च्याम्पियनसिपको महिला र पुरुष विजेताले ४ लाख प्राप्त गर्दा उपविजेताले २ लाख पाउने छन् । तेस्रोले १ लाख प्राप्त गर्नेछन् ।
त्यस्तै सर्वोत्कृष्ट खेलाडीले २५ हजार प्राप्त गर्दा विधागततर्फ उत्कृष्ट हुनेले १० हजार पाउने छन् ।
