काठमाडौं । साविक विजेता हेल्प नेपाल छैटौं संस्करणको एनभीए महिला तथा पुरुष क्लब भलिबल च्याम्पियनसिप अन्तर्गत पुरुषतर्फ सेमिफाइनलमा प्रवेश गरेको छ ।
त्रिपुरेश्वरस्थित राखेप कभर्डहलमा बिहीबार भएको पहिलो क्वाटरफाइनलमा नयाँ बजार सामाजिक युवा क्लबलाई ३-० को सोझो सेटमा हराउँदै हेल्प अन्तिम चारमा पुगेको हो ।
भारतीय खेलाडीसहित कोर्ट उत्रिएको हेल्पले नयाँ बजारमाथि २५-२०,२५-१० र २५-१७ को सेटमा जित निकाल्यो । नयाँ बजार भने क्वाटरफाइनलबाट बाहिरिएको छ ।
च्याम्पियनसिप अन्तर्गत नै आज हुने दोस्रो क्वाटरफाइनलमा नेपाल पुलिस क्लब र ढोरपाटन स्पोर्ट्स क्लबबीच प्रतिस्पर्धा हुनेछ ।
त्यस्तै तेस्रो क्वाटरफाइनलमा त्रिभुवन आर्मी क्लब र गल्कोट स्पोर्ट्स क्लबबीच खेल हुनेछ । दुई टिमबीचको खेल ४ बजे सुरु हुनेछ ।
चौंथो क्वाटरफाइनलमा एपीएफ र गण्डकी प्रदेशबीच प्रतिस्पर्धा हुनेछ । उक्त खेल साँझ ६ बजे सुरु हुनेछ ।
च्याम्पियनसिपको सम्पूर्ण खेलको प्रत्यक्ष प्रशारण खेलपाटी डटकमले गर्नेछ ।
नेपाल भलिबल संघले आयोजना गरेको च्याम्पियनसिपमा पुरुषतर्फ १४ टोली र महिलातर्फ ६ टोलीको सहभागिता रहेको छ ।
च्याम्पियनसिपबाट पुरुषतर्फ ७ र महिलातर्फ ५ टोली चैतमा आयोजना हुने क्लब लिगमा स्थान बनाउने छन् ।
महिला पुरुष विजेताले ४ लाख प्राप्त गर्दा उपविजेताले २ लाख पाउने छन् । तेस्रोले १ लाख प्राप्त गर्नेछन् ।
त्यस्तै सर्वोत्कृष्ट खेलाडीले २५ हजार प्राप्त गर्दा विधागततर्फ उत्कृष्ट हुनेले १० हजार पाउने छन् ।
