काठमाडौं । साविक विजेता हेल्प नेपाल स्पोर्ट्स क्लबले छैटौं संस्करणको एनभीए महिला तथा पुरुष क्लब भलिबल च्याम्पियनसिप अन्तर्गत पुरुषतर्फ लगातार दोस्रो जित निकालेको छ ।
त्रिपुरेश्वरस्थित राखेप कभर्डहलमा मंगलबार प्रदेश-२ लाई ३-० को सोझो सेटमा पराजित गर्दै हेल्पले लगातार दोस्रो जित निकालेको हो ।
भारतीय खेलाडीसहित कोर्ट उत्रिएको हेल्पले प्रदेश २ माथि २५-२१, २५-१७ र २५-१६ को सेटमा जित निकाल्यो ।
यस जितसँगै हेल्प नेपालले क्वाटरफाइनलमा स्थान पक्का गरेको छ । समूह ए को हेल्प नेपालले २ खेलमा ६ अंक जोड्यो ।
पहिलो खेलमा हेल्पले बागमती प्रदेशलाई ३-० को सेटमा पराजित गरेको थियो ।
यस समूहबाट गल्कोट स्पोर्ट्स क्लब समेत क्वाटरफाइनलमा पुगेको छ ।
च्याम्पियनसिप अन्तर्गत पुरुषको आज हुने दोस्रो खेलमा मणिमुकुन्द भलिबल क्लब र गण्डकी प्रदेशबीच प्रतिस्पर्धा हुनेछ । यस खेल २ बजे सुरु हुनेछ ।
यस्तै तेस्रो खेलमा त्रिभुवन आर्मी क्लब र नयाँ बजार सामाजिक युवाबीच खेल हुनेछ । यस खेल दिउँसो ४ बजे सुरु हुनेछ ।
पुरुषको चौंथो खेलमा एपीएफले बुढानिलकण्ठ भलिबल क्लबसँग खेल्नेछ । उक्त खेल साँझ ६ बजे सुरु हुनेछ ।
च्याम्पियनसिपको सम्पूर्ण खेलको प्रत्यक्ष प्रशारण खेलपाटी डटकमले गर्नेछ ।
नेपाल भलिबल संघले आयोजना गरेको च्याम्पियनसिपमा पुरुषतर्फ १४ टोली र महिलातर्फ ६ टोलीको सहभागिता रहेको छ ।
पुरुषतर्फ सहभागी टोलीलाई ४ समूहमा विभाजन गरिएको छ । हरेक समूहका शीर्ष दुई टोलीले क्वाटरफाइनलमा स्थान बनाउनेछ ।
महिलातर्फ ६ टोलीलाई दुई समूहमा विभाजन गरिएको छ । हरेक समूहका शीर्ष दुई टोलीले सेमिफाइनलमा स्थान बनाउनेछ ।
च्याम्पियनसिपबाट पुरुषतर्फ ७ र महिलातर्फ ५ टोली चैतमा आयोजना हुने क्लब लिगमा स्थान बनाउने छन् ।
महिला पुरुष विजेताले ४ लाख प्राप्त गर्दा उपविजेताले २ लाख पाउने छन् । तेस्रोले १ लाख प्राप्त गर्नेछन् ।
त्यस्तै सर्वोत्कृष्ट खेलाडीले २५ हजार प्राप्त गर्दा विधागततर्फ उत्कृष्ट हुनेले १० हजार पाउने छन् ।
