एन्फामा 'अर्ली' चुनावको माग

काठमाडौं । अखिल नेपाल फुटबल संघ (एन्फा)को प्रवक्ताबाट राजीनामा दिएका केन्द्रिय सदस्य किरण राईले संघको अर्ली चुनावको माग गरेका छन् ।

सोमबार एन्फा अध्यक्ष कर्माछिरिङ शेर्पालाई राजीनामा पत्र बुझाएका प्रवक्ताले वर्तमान फुटबलको समाधान चुनावबाट मात्र निस्कने दाबी गरे ।

‘एन्फा विवादको समाधान हाम्रो हातमा छैन । एन्फा भित्र जुन शक्ति संघर्ष चलेको छ, यसको समाधान देखिदैन ।’ उनले भने, ‘चाँडो जिल्ला र प्रदेश अधिवेशन सकेर ६–७ महिनाभित्र नयाँ चुनाव गर्नुपर्छ ।’

राईले फुटबलमा पछिल्लो समय जालझेल र षड्यन्त्र उत्कर्षमा पुगेको बताउँदै फुटबल विकासका लागि सबै जना रोकिनुपर्ने अवस्था आएको उल्लेख गरे ।

राईले एन्फाभित्र अध्यक्ष र वरिष्ठ उपाध्यक्षको विवादले फुटबललाई राम्रो नगर्ने बताए ।

मुख्य प्रशिक्षक अब्दुल्लाहा अलमुताइरीको राजीनामा प्रकरण र प्रशिक्षकले वरिष्ठ उपाध्यमाथि लगाएको आरोपले फुटबल विवाद उत्कर्षमा पुगेको छ । प्रवक्ताको हैसियतामा राईले संस्थागत धारणा राख्दै आएका थिए ।

आइृतबारको पत्रकार सम्मेलनमा उनले पछिल्लो केन्द्रिय समिति बैठकको निर्णयमा आपत्ति जनाए । फुटबलभित्रको विवाद एन्फाभित्रै समाधान खोजिनुपर्नेमा युवा तथा खेलकुद मन्त्रालयलाई छानविनका लागि सिफारिस गर्ने एन्फाको निर्णय उनले खराब रहेको बताए ।

'मन्त्रालयलाई छानविनका लागि सिफारिस गर्ने निर्णयमा गल्ती भयो । राष्ट्रिय र अन्तराष्ट्रिय नियम र फुटबलको मर्मत अनुसार फुटबल भित्रको समस्या फुटबल भित्रबाट हल गर्नपर्छ भन्ने मान्यता छ ।' उनले भने, 'बैठकले तेस्रो व्यक्तिको आह्वान गरेको छ । यसले खराब नजिर बस्यो । यदी फुटबलको विषय हो भने मन्त्रालयले हल गर्न सक्दैन । राखेप हुँदै पुन एन्फामै सो विवाद आउँछ । यसले विवाद जटिलतातर्फ गएको छ ।'

एन्फा कार्यसमिति बैठकमा उनले संघभित्र समस्याको समाधान खोजिनुपर्ने धारणा राखेका थिए । एन्फा विवादमा मन्त्रालयलाई घुसाउन नहुने उनको तर्क थियो । तर अध्यक्ष शेर्पाले आफु समेत मुछिएको विषयमा उच्च स्तरीय छानविन गर्नुपर्ने भन्दै मन्त्रालयलाई सिफारिस गर्ने निर्णय गराएका थिए ।

उनले जिम्मेवारीमा बसेर स्वतन्त्रपूर्वक धारणा राख्न नसकिने भएकाले आफु बाहिर आएको प्रष्टोक्ति दिए ।

'स्वतन्त्रपूर्वक विचार राख्न पर्ने भएकाले राजीनामा गरेको बाहिर आएको हुँ । यसमा कसैलाई दोषारोपण गर्न चाहन्न ।' उनले भने ।

राईले फुटबल भित्रको राजनीतिक अन्तरसंघर्षले फुटबललाई असर गर्न नहुने धारणा राखे ।

'राजनीति र फुटबलको गतिविधि दुई फरक ध्रुवबाट जानपर्छ ।' उनले भने, 'फुटबल पदाधिकारी तल्लो स्तरको गालीगलौजमा जानु हुदैन । फुटबलभित्र जे जालझेल भइरहेको छ । त्यो गम्भिर छ ।'

उनले प्रशिक्षकको राजीनामा प्रकरणमा वरिष्ठ उपाध्यक्षमाथि बढीनै अन्याय भएको बताए । प्रवक्ताको जिम्मेवारीबाट बाहिर रहेपनि उनले फुटबलमा मध्यस्तकर्ताको भूमिका निर्वाह गर्ने धारणा राखे ।

प्रवक्ता राईले आईतबारनै दिउँसो पत्रकार सम्मेलन गरेर राजीनामा घोषणा गर्ने तयारी गरेका थिए । तर बिहानै अध्यक्षसंग भेटेपछि उनी ब्याक पनि भएका थिए । तर पुन सोमबार बिहानै उनले राजीनामा दिने निर्णयमा पुगे ।

राईले अध्यक्ष कर्माछिरिङ शेर्पाको प्यानलबाट एन्फाको केन्द्रिय सदस्य जितेका थिए । शेर्पाले उनलाई एन्फा प्रवक्तामा नियुक्त गरेका थिए ।

एन्फाभित्रको राजनीतिमा राई वरिष्ठ उपाध्यक्ष निकट मानिन्छन् । तर उनले अध्यक्ष र वरिष्ठ उपाध्यक्षसंग समदुरी राख्दै काम गर्दै आएका थिए।

तर प्रशिक्षकको राजीनामा प्रकरणसंगै एन्फाभित्र कित्ताकाटको अवस्था सिर्जना भएको छ । सोही प्रकरणमा असन्तुष्ट रहदै आएका राईले अन्तत प्रवक्ताको जिम्मेवारीबाट राजीनामा दिएका हुन् ।

याे पनि, एन्फा प्रवक्ता राईद्वारा राजीनामा