नेदरल्यान्ड्सलाई समूह विजेताको अवसर

एजेन्सी । १६ औं संस्करणको युरोकप फुटबलमा आज (सोमबार)नेदरल्यान्ड्सले समूह चरणको अन्तिम खेलमा नर्थ म्यासेडोनियासँग प्रतिस्पर्धा गर्दैछ ।  

समूह 'सी' मा रहेको नेदरल्यान्ड्स र नर्थ म्यासेडोनियाबीचको खेल राति ९:४५ बजे सुरु हुनेछ ।

नेदरल्यान्ड्स यस अघि नै नकआउट चरणमा प्रवेश गरिसकेको छ । अघिल्ला दुई खेलमा नेदरल्यान्ड्सले लगातार जित निकालेको थियो ।

नेदरल्यान्ड्सले पहिलो खेलमा युक्रेनलाई ३-२ ले हराएको थियो भने दोस्रो खेलमा अष्ट्रियालाई २-० ले हराएको थियो ।

आज नर्थ म्यासेडोनियालाई हराएर नेदरल्यान्ड्स समूह विजेता बन्दै अन्तिम १६ मा पुग्न चाहन्छ । ६ अंक जोडेको नेदरल्यान्ड्स शीर्ष स्थानमा रहेको छ ।

'नर्थ म्यासेडोनिया यहाँ रहन योग्य छ । उनीहरुले राम्रो गरिरहेका छन् । व्यवस्थित टिम छ । हामी उनीहरुलाई कमजोर मान्ने छैनौँ,' डच प्रशिक्षक फ्रान्क डी भन्छन् ।

नर्थ म्यासेडोनिया अंक विहीन रहदै पुछारमा रहेको छ । म्यासेडोनियाले अघिल्ला दुबै खेल गुमाएको थियो ।

पहिलो खेलमा म्यासेडोनिया अष्ट्रियासँग ३-१ ले पराजित हुँदा दोस्रो खेलमा युक्रेनसँग २-१ ले पराजित भएको थियो ।

समूह चरणको अन्तिम खेलमा जित निकाल्दै नर्थ म्यासेडोनिया सुखद अन्त्य गर्न चाहन्छ ।

'हामी युरोपियन च्याम्पियनसिप खेल्न योग्य छौँ । हामी डच टिमसँग खेल्दै छौँ । हामी राम्रो खेल्दै प्रतियोगिताको पहिलो अंक जोड्ने छौँ,' म्यासेडोनियाका प्रशिक्षक इगोर भन्छन् ।

प्लेयर्स टु वाच -

गोरान पाण्डेभ :

नर्थ म्यासेडोनियाका अनुभवी स्ट्राइकर हुन् गोरान पाण्डेभ । ३७ वर्षीय यी अट्याकरले डच टिमविरुद्ध महत्वपूर्ण भूमिका खेल्न सक्छन् ।

नर्थ म्यासेडोनियाका लागि ‘डेन्जर फिनिसर’ का रुपमा चिनिदै आएका गोरान इटालियन सिरि 'ए' क्लब जेनोआबाट व्यावसायिक फुटबल खेल्ने गर्छन ।

गोरानले जारी युरो कपको २ खेलमा १ गोल गरिसकेका छन् । ६ फिट अग्ला कप्तान गोरान ३७ गोल गर्दै नर्थ म्यासेडोनियाका सर्वाधिक गोलकर्ता समेत हुन् ।

इटाली क्लब लाजियोबाट आफुलाई चर्चामा ल्याएका गोरानले नापोली, गालातासारे, इन्टर मिलानबाट खेलिसकेका छन् । राष्ट्रिय टोलीबाट १ सय २१  खेल खेलेका छन् ।

सेन्टर फर्वाड तथा राईट विंगर दुबै भूमिका सहजै निभाउने गोरान नेदरल्यान्ड्सका लागि घातक सावित हुन सक्छन् ।

जर्जिनियो विनाल्डम :

नेदरल्यान्ड्सले अघिल्ला दुई खेलमा जित निकाल्दा विनाल्डमको प्रदर्शन प्रभावशाली थियो । अघिल्ला दुई खेलमा उनले १ गोल समेत गरिसकेका छन् । त्यसैले समूह चरणको अन्तिम खेल्न उनी डच टिमको मुख्य खेलाडी हुने छन् ।

हालै इंग्लिस क्लब लिभरपुरबाट फ्रेन्च क्लब पीएसजी आएका ३० वर्षीय अनुभवी मिडफिल्डर म्यासेडोनियाविरुद्ध छाउने अनुमान गरिएको छ ।  उनी टिममा कप्तान समेत हुन् ।

विनाल्डमले डच टिमको उमेर समूहको यू-१७, १९, २१ टोलीबाट खेलिसकेका छन् । यस्तै सिनियर टोलीबाट उनले ७७ खेल खेल्दै २३ गोल गरेका छन् ।