हाभर्टेजले रचे इतिहास

एजेन्सी । अट्याकिङ मिडफिल्डर काइ हाभर्टेज युरोपियन च्याम्पियनसिपमा गोल गर्ने जर्मनीका सबैभन्दा कम उमेरका खेलाडी बनेका छन् ।

१६ औं संस्करणको युरोकप अन्तर्गत पोर्चुगलविरुद्ध गोल गर्दै हाभर्टेजले इतिहास रचेका हुन् । म्युनिखमा साविक विजेता पोर्चुगललाई ४-२ गोल अन्तरले पराजित गर्दा हाभर्टेजले एक गोल गरेका थिए ।

पोर्चुगलविरुद्ध गोल गर्दा उनी २२ वर्ष ८ दिनका थिए । उनी मुख्य ठुला प्रतियोगितामा जर्मनीका लागि गोल गर्ने सर्वाधिक कम उमेरका दोस्रो खेलाडी हुन् ।

विश्वकपमा जर्मनीका लागि सर्वाधिक कम उमेरमा गोल खेलाडीको कीर्तिमान थोमस मुलरको नाममा रहेको छ । सन् २०१० को विश्वकपमा उरुग्वेविरुद्ध गोल गर्दा मुलर २० वर्ष ३ सय दिनका थिए ।

'हामी प्रदर्शनबाट सन्तुष्ट छौँ,' खेलपछि चेल्सीका खेलाडी हाभर्टेजले भने, 'उनीहरूविरुद्ध हामीले राम्रो खेल्यौं ।'