पलेशा पाराओलम्पिकका लागि छनोट

काठमाडौं । नेपाली पारा तेक्वान्दो खेलाडी पलेशा गोवर्धनले जापानको टोकियोमा पाराओलम्पिकमा सहभागिता जनाउने भएकी छिन् ।

नेपाल तेक्वान्दो संघले बुधबार विज्ञप्ति जारी गर्दै पलेशा वाईल्ड कार्ड प्राप्त गर्दै पाराओलम्पिकका लागि छनोट भएको जनाएको छ ।

टोकियोमा २०७८ भाद्र १७ देखि १९ गते सम्म आयोजना हुने पाराओलम्पिकमा गोवर्धनले के. ४४, ५८ केजी मुनि प्रतिस्पर्धा गर्ने छिन् ।

नेपाली पारा तेक्वान्दो खेलाडीहरुले २०७८ जेष्ठ ७ गते जोर्डनको अम्मान शहरमा भएको छनोट प्रतियोगिता खेल्नु पर्ने थियो । तर, कोरोना महामारीका कारण अन्तराष्टिय हवाई उडान बन्द हुनुका साथै उक्त छनौट प्रतियोगितामा प्रतिस्पर्धा गर्न बिदेशी खेलाडीहरुले तेश्रो मुलुकमा कम्तिमा २ हप्ता आईसोलेशनमा बस्नु पर्ने बाध्यताका कारण नेपाली खेलाडी छनोट खेल्नबाट बञ्चित भएका थिए ।

छनोटमा पलेशासहित ६ खेलाडीले खेल्ने तय थियो । तसर्थ उक्त छनोट खेलबाट बञ्चित भए पश्चात नेपाल तेक्वान्दो संघले पलेशा र रञ्जना धामी (के.४४, ४९ केजी)को नाम राष्ट्रिय पाराओलम्पिक कमिटिको समन्वयमा वाईल्ड कार्डको लागि पहल गरेको थियो ।

पलेशा विश्व तेक्वान्दो महासंघको १३ औं वरीयतामा रहेको र विश्व तेक्वान्दो महासंघ एवं अन्तराष्ट्रिय पाराओलम्पिक कमिटिबाट नेपाललाई १ ओटा मात्रै कोटा दिने व्यवस्था भएकोले गोबर्धनले वाईल्ड कार्ड प्राप्त गर्न सफल भएको संघले जनाएको छ ।

नेपाली राष्ट्रिय पारा तेक्वान्दो खेलाडी पलेशाले नेपाल तेक्वान्दो संघ अन्तर्गत रहेको पारा राष्ट्रिय टिममा २०७२ साल देखि नियमित तालिम तथा प्रशिक्षण लिई रहेकी छिन् ।

पलेशाले भियतनामको होचिमिन्ह २०१८ मा आयोजित चौथो एशियन पारा तेक्वान्दो ओपन प्रतियोगितामा पहिलो पकट के.४४, ५८ केजी माथि तेश्रो स्थान प्राप्त गर्न सफल भई मुलुकलाई कास्य पदक दिलाएकी थिईन् ।

यस्तै उनले पहिलो पटक कोरियामा आयोजना भएको तेश्रो एशियन अन्तगराष्ट्रिय पारा तेक्वान्दो ओपन प्रतियोगिता २०१७ मा के४४, ५८ केजी मुनि तौल समुहमा प्रतिस्पर्धा गर्दै ५ औ स्थान प्राप्त गर्न सफल भएकी थिईन् । सोही वर्ष लण्डनमा आयोजित ७ औं विश्व पारा तेक्वान्दो प्रतियोगिता २०१७ मा पनि ५ औ स्थानमा प्राप्त गरेकी थिईन् ।

पाँचौ एशियन पारा तेक्वान्दो प्रतियोगिता आममन, जोर्डन २०१९ मा भएको खेलमा के.४४, ५८ केजी माथि ५ औं स्थानमा र ८औं विश्व पारा तेक्वान्दो प्रतियोगिता अन्तलया, टर्की मा के.४४, ५८ केजी माथि तौल समुहमा निकै राम्रो प्रदर्शनका बावजुद ५ औं स्थान प्राप्त गर्न सफल भएको नेपाल तेक्वान्दो संघद्वारा जारी विज्ञप्तिमा जनाईएको छ ।