ए डिभिजन लिग उपाधि कसको ?

काठमाडौं । करिब पाँच बर्ष स्थगित भएको ए डिभिजन लिग शनिबार सुरु भएको छ । घरेलु फुटबलको लामो संक्रमण पार गर्दै सुरु भएको प्रतियोगितालाई आयोजक अखिल नेपाल फुटबल संघ एन्फाले ‘वार्मअप’ लिगको रुपमा ब्याख्या गरेको छ । अर्थात यसपटकको लिग फुटबलमा कुनै टोली रेलिगेशनमा पर्ने छैनन् ।

लिगको सुन्दरता भनेकै बढुवा अनि घटुवा हो । यसैलाई लिग फुटबलको मर्म मानिन्छ, प्राण ठानिन्छ । तर शनिबार सुरु भएको रेलिगेशनबिनाको ए डिभिजन लिगले कस्तो नतिजा दिने हो, समय पर्खन पर्छ । रेलिगेशन बिनाको लिगले धेरै क्लबलाई भने राहत मिलेको छ । रेलिगेशन नहुने भएपछि धेरै क्लबले पैसा समेत खुलेर खर्च गरेनन् । न राम्रा खेलाडी अनुबन्धनमा जोड गरे ।

प्रतियोगिताको तयारीमा रहेका धेरै क्लबसंग लक्ष्यका बिषयमा प्रश्न गर्दा राम्रो स्थान ल्याउन प्रयास गर्ने बताएका थिए । धेरै क्लबले यसपटकको लिगलाई अर्को बर्ष हुने प्रतियोगिताको तयारीको रुपमा लिएका छन् ।

फुटबल क्लबको ठुलो रकम खेलाडीलाई दिने तलबमा खर्च हुने गर्छ । तर धेरै क्लबले खेलाडी अभावको कारण देखाउदै लिगमा राम्रा खेलाडी अनुबन्धनमा खासै जोड गरेनन् । खर्च गरेनन् ।

तर, घरेलु फुटलबका केही क्लबले लिग जित्ने लक्ष्य सहित तयारीलाई अघि बढाएका थिए । क्लबको लगानी, तयारी र खेलाडी अनुबन्धनका आधारमा पल्सर सहिद स्मारक ए डिभिजन लिगको दोबेदार चार टोली यस्ता छन् ।

सिग्नेचर मनाङ मस्र्याङ्दी क्लब

घरेलु फुटबलको सर्वाधिक सफल र लोकप्रिय क्लब हो मनाङ । खेलाडी अनुबन्धनमा ठुलो धनराशी खर्चिने मनाङ हरेक लिगमा दाबेदारको रुपमा आफुलाई प्रस्तुत गर्ने गर्छ । राष्ट्रिय टिमका धेरै अनुहार क्लबमा राख्न सफल मनाङलाई धेरैले खर्चालु क्लब मान्छन् । सर्वाधिक सात पटक लिग जितेको ईतिहास बनाएको मनाङले यसपटक राष्ट्रिय टिमका खेलाडी सहित उत्कृष्ट विदेशी खेलाडीलाई क्लबमा अनुबन्धन गरेको छ ।

राष्ट्रिय टिमका कप्तान विराज महर्जन सहित विमल बस्नेत, सुजल श्रेष्ठ, विशाल राई, अन्जन विष्ट, हेमन गुरुङ लगायतका खेलाडी भरिएको मनाङले ओलावले अफिज र एडिलाजा जस्ता खतरनाक स्ट्राईकरलाई ल्याएको छ । कमजोर डिफेन्सलाई सुधार गर्न एक अफ्रिकन खेलाडीको खोजिमा रहेको मनाङले दक्षिण एसियाली कोटाबाट एक भारतीय खेलाडीलाई समेत लिगमा उतार्दैछ । मनाङका महासचिव मुखिया लामा भन्छन्, टिम सेट हुन बाँकी छ, तर मनाङको एकमात्र उद्वेश्य भनेको लिग उपाधि जित्नु हो ।

रुस्लान थ्रीस्टार क्लब

घरेलु फुटबलको लोकप्रिय र अर्को सफल क्लब हो, रुस्लान थ्रीस्टार क्लब । ललितपुरको रैथाने क्लब थ्रीस्टार हरेक प्रतियोगिताको उपाधि दाबेदार हो । यस पटकको लिग फुटबलको सबै भन्दा सन्तुलित टिम थ्रीस्टारलाई उपाधिको प्रमुख दाबेदार मानिएको छ । कारण, राष्ट्रिय टिमका स्टार खेलाडीले भरिएको थ्रीस्टारले युवा र अनुभवी खेलाडीको संयोजन गर्दै टिम बनाएको छ ।

एलन न्यौपाने, अनन्त तामाङ, बिक्रम लामा, सुनिल वल, निराजन खड्का जस्ता स्टार खेलाडीले भरिएको थ्रीस्टारमा रुपेश केसी, रजिन धिमाल, रन्जन विष्ट र अनिल गुरुङ जस्ता खेलाडीको साथ छ । थ्रीस्टारले केही बिदेशी खेलाडीलाई लामो समयदेखि अनुबन्धन गरेर राखेको छ ।

डिफेन्समा पिटर र स्ट्राईकरमा अजायी मार्टिन थ्रीस्टारको जर्सीमा यथावत रहनेछन् । थ्रीस्टारका हाईप्रोफाईल प्रशिक्षक मेघराज केसी क्लबको उपाधि यात्रा ‘एक्स फ्याक्टर’ बन्न सक्छन् । लामो समय प्रशिक्षण यात्रामा बिताएका केसीलाई लिग उपाधि जित्ने लक्ष्य सहित क्लबले प्रशिक्षणको जिम्मेवारी सुम्पिएको छ ।

आर्मी फुटबल क्लब

पछिल्लो सिजन विभागीय टिम आर्मी लिग उपाधि जित्न मात्र एक अंकले चुक्यो । गत सिजन घरेलु फुटबलका अधिकांश नकआउट प्रतियोगितामा बलियो देखिएको आर्मीले घरेलु फुटबलको ईतिहासमा अहिलेसम्म लिग उपाधि जित्न सकेको छैन ।

राष्ट्रिय टिममा प्रभावशाली देखिएका भरत खवास, नवयुग श्रेष्ठ, जर्जप्रिन्स कार्की र विकेश कुथु जस्ता खेलाडी समावेश आर्मीले लिग उपाधिलाई मुख्य जोड दिएको छ । घरेलु फुटबल करिब पाँच बर्ष प्रभावित बन्यो । अधिकांश खेलाडीले नियमित टे«निङ र प्रशिक्षण गर्न पाएनन् । तर विभागीय टिमहरुले भने नियमित प्रशिक्षण र अभ्यासको मौका पाए ।

लिग फुटबलमा डेब्यु गर्न लागेका प्रशिक्षक नविन न्यौपानेलाई खेलाडीबाट सायद फिटनेशको समस्या नहोला । तर शारिरिक रुपमा बलियो मानिने आर्मीलाई प्राविधिक रुपमा अब्बल तरिकाले प्रस्तुत गरेर उपाधि हात पार्नु चुनौतीपुर्ण छ ।

नेपाल पुलिस क्लब 
६० सालपछि विभागीय टिम पुलिसले घरेलु फुटबलमा एकछत्र राज ग¥यो । लिग होस वा नकआउट सबै प्रतियोगितामा आफुलाई अब्बल सावित ग¥यो । विराजकृण्ण श्रेष्ठको नेतृत्वमा पुलिसले त्यो समय शारिरिक र प्राविधिक रुपमा उत्कृष्ट प्रर्दशन गरेको थियो । जुमानु राई, भोला सिलवाल, भरत खवास, रविन श्रेष्ठ, रितेश थापा जस्ता स्वर्णिम पुस्ताका खेलाडीले पुलिसले घरेलु फुटबलमा राम्रै छाप छाड्यो ।

समयसंगै पुलिसको ओरालो यात्रा सुरु भयो । खेलाडीको ढल्कदो उमेरसंगै पुलिसको प्रर्दशन समेत खस्किन थाल्यो । एक समय हार्न लागेको खेल जित्ने पुलिस अब भने जित्ने निश्चित भएका खेलहरु गुमाउन थाल्यो ।

घरेलु खेलकुदमा छुट्टै विरासत बनाएको पुलिसले फुटबल टिममा पुर्नसंरचना गरेको छ । पुराना खेलाडीलाई पुर्नस्थापना गर्दै युवा खेलाडी क्लबमा भित्राएको छ । एन्फा एकेडेमीमा रहँदै उमेर समुहका प्रतियोगितामा राम्रा छाप छाडेका रेजिन सुब्बा, रवि पासवान, अभिषेक रिजाल, तेज तामाङ जस्ता खेलाडीलाई पुलिसले क्लबमा ल्याउन सफल भएको छ । पुराना र युवा खेलाडीको राम्रो संयोजन गरेको पुलिस पुरानो विरासत फर्काउन सक्षम देखिन्छ ।

च्यासल युथ क्लब 
यसपटकको ए डिभिजन लिगमा अर्को सरप्राईज टोली हो, च्यासल युथ क्लब ।

लिग फुटबलमा डेब्यु गर्न लागेको च्यासलले हाईप्रोफाईनल प्रशिक्षक राजुकाजी शाक्यलाई क्लबमा अनुबन्धन गरेर लिगमा राम्रो नतिजा निकाल्ने लक्ष्य लिएको छ । नेपाली राष्ट्रिय फुटलब टिमका स्टार विमल घर्तिमगरलाई समेत अनुबन्धन गर्न सफल भएको क्लबमा योगेश गुरुङ, हेमन्त थापा मगर, गौरव बुढाथोकी, आमिर श्रेष्ठ जस्ता खेलाडीको साथ छ । च्यासलले यसपटकको लिग फुटलबमा उपाधिमा चुनौती दिने बताईसकेको छ ।