उपाधिका लागि युनाईटेड र भिल्ला भिड्दै

एजेन्सी । युरोपा लिग फुटबलको फाइनल खेल आज राति हुँदैछ ।

उपाधिका लागि इंग्लिस क्लब म्यानचेस्टर युनाईटेड र स्पेनिस क्लब भिल्ला रियलबीच प्रतिस्पर्धा हुनेछ ।

पोल्याण्डको पोल्साट एरिनामा हुने उपाधि भिडन्त राति १२:४५ बजे सुरु हुनेछ ।

आज युनाईटेड र भिल्ला जित निकाल्दै उपाधि जित्ने योजनासहित मैदान उत्रने छन् ।

युनाईटेडले पछिल्लो चार वर्ष यता कुनैपनि उपाधि जित्न सकेको छैन ।

भिल्ला रियललाई हराएर युनाईटेड उपाधिको खडेरी तोड्न चाहन्छ ।

यस्तै युनाईटेड दोस्रो पटक उपाधि जित्न चाहन्छ । युनाईटेडले सन् २०१७ मा युरोपा लिग जितेको थियो ।

भिल्ला भने पहिलो पटक युरोपा लिग जित्ने योजनामा हुनेछ ।

भिल्लाले अहिलेसम्म उपाधि जित्न सकेको छैन ।

भिल्लाले सेमिफाइनलमा आर्सनललाई समग्रमा २-१ ले हराएर फाइनलमा स्थान पक्का गरेको छ ।

त्यसैले भिल्ला फाइनलमा पनि अर्को इंग्लिस क्लबलाई हराउने योजनामा हुनेछ ।

युनाईटेडले सेमिफाइनलमा इटालियन क्लब रोमालाई समग्रमा ८-५ ले हराएको थियो ।