धनगढीलाई हराउँदै बुटवल प्ले अफमा
काठमाडौं । बुटवल लुम्बिनी एफसी पहिलो संस्करणको फ्रेन्चाईज फुटबल प्रतियोगिता नेपाल सुपर लिग (एनएसएल) को प्ले अफमा प्रवेश गरेको छ ।
शनिबार भएको खेलमा धनगढी एफसीलाई १-० गोल अन्तरले पराजित गर्दै बुटवल प्ले अफमा पुगेको हो ।
त्रिपुरेश्वरस्थित दशरथ रंगशालामा बुटवललाई जित दिलाउन सुमन लामाले निर्णायक गोल गरे ।
प्रतिस्पर्धात्मक बनेको खेलको पहिलो हाफ गोलरहित बराबरीमा सकिएको थियो । दुबै टोलीले पहिलो हाफमा गोलको अवसर भने बनाएको थियो ।
खेलको १५ औं मिनेटमा बुटवलका स्ट्राइकर अभिषेक रिजालको बाइसाइकल प्रहार धनगढीका गोलरक्षक किरण चेम्जोङले सहजै बचाए । त्यसको एक मिनेट नबित्दै धनगढीका सौजन राईको प्रहारले पोस्टको दिशा लिन सकेन ।
खेलको ३२ औं मिनेटमा बुटवलका विलियम ओपोकुले मैदानको मध्य भागबर प्रहार गरेको फ्रिकिक धनगढीका गोलरक्षक किरणले सहजै बचाए ।
३४ औं मिनेटमा रविन श्रेष्ठको पासमा मैदानको बायाँ भागको बक्स बाहिरबाट विलियमको शक्तिशाली प्रहार किरणले रोके ।
खेलको ४५ औं मिनेटमा धनगढीका दर्शन गुरुङको प्रहार पोस्ट नजिकैबाट बाहिरीयो ।
पहिलो हाफको इन्जुरी समयको पहिलो मिनेटमा बक्स बाहिरबाट बुटवलका लक्षण रुचालको फ्रिकिक पोस्ट बारमाथिबाट गएको थियो ।
दोस्रो हाफमा धनगढीले गोलको थुप्रै अवसर सिर्जना गर्यो । तर, गोल गर्न सकेन । बुटवलले भने पाएको मौकालाई सदुपयोग गर्यो ।
खेलको ५६ औं मिनेटमा धनगढीका दर्शन गुरुङको हेडर पोस्टमा लाग्दै फर्किएको थियो ।
६५ औं मिनेटमा धनगढीका निशान लिम्बुले गोलको अवसर खेर फाले । पुजन उपरकोटीको लामो पासमा गोलरक्षक विशाल श्रेष्ठसँगको वान भर्सेस वानको स्थितमा निशानको प्रहार पोस्टमा लागेर बाहिरिएको थियो ।
खेलको ६७ औं मिनेटमा बुटवलका ओमोलाजा करिमको फ्रिकिक धनगढीका गोलरक्षक किरणले डाइभ हान्दै बचाएका थिए ।
७२ औं मिनेटमा विलियमले धनगढीका डिफेन्डरलाई बिट गर्दै अगाडी बढाएर प्रहार गरेको बलले पोष्टको दिशा लिन सकेन ।
तर, खेलको ८० औं मिनेटमा सुमनले गोल गर्दै बुटवललाई अग्रता दिलाए । मैदानको मध्ये भागबाट ओमोलाजाले दिएको पासमा विलियमले धनगढीका डिफेन्डरलाई बिट गर्दै बल अगाडी बढाएका थिए । उक्त बललाई विलियमले सेकेन्ड बारमा स्विच गरेको बलमा सुमनले गोल गरे । जुन गोल खेलको निर्णायक गोल बन्यो ।
खेलमा बुटवलका विलियम ओपकु प्लेयर अफ दि म्याच चुनिए । उनले २५ हजार प्राप्त गरे ।
इमर्जिङ प्लेयर अफ दि म्याच बुटवलकै सुमन लामा चुनिए । उनले १० हजार प्राप्त गरे ।
जितसँगै बुटवलले ६ खेलमा ८ अंक जोडेको छ । र, बुटवल चौंथो स्थानमा रहदै प्ले अफमा पुगेको हो ।
बुटवलको जितसँगै पोखरा थन्डर्स भने प्रतियोगिताबाट बाहिरिएको छ । पोखरा ८ अंक जोडेपनि हेड टु हेडको आधारमा बुटवलसँग पछि पर्यो।
धनगढी भने यस अघि नै प्ले अफमा पुगिसकेको छ । शीर्ष स्थानको धनगढीले ६ खेलमा १० अंक जोडेको छ ।
बुटवलको जितसँगै प्रतियोगिताको प्ले अफमा पुग्ने चार टिमको टुंगो लागेको छ ।
प्रतियोगितामा बुटवल र धनगढीसँगै काठमाडौं रेजर्स र ललितपुर सिटी एफसीले प्ले अफमा स्थान बनाएका छन् ।
