ललितपुर प्ले अफमा, विराटनगर बाहिरियो

काठमाडौं । ललितपुर सिटी एफसी पहिलो संस्करणको फ्रेन्चाईज फुटबल प्रतियोगिता नेपाल सुपर लिग (एनएसएल) को प्ले अफमा प्रवेश गरेको छ ।

शनिबार भएको खेलमा १० खेलाडीमा सिमित विराटनगर सिटी एफसीलाई ४-० गोल अन्तरले पराजित गर्दै ललितपुरले प्ले अफमा स्थान सुरक्षित गरेको हो ।

त्रिपुरेश्वरस्थित दशरथ रंगशालामा ललितपुरलाई जित दिलाउन कप्तान अन्जन बिष्टले दुई गोल गरे । विमल राना र नुर्लान जाहिदको नाममा एक एक गोल रह्यो ।

निकै तनाव ग्रस्त बनेको खेलमा दुबै टोलिले सुरुवातबाटै आक्रमक खेल पस्किएको थियो ।

खेलको छैटौं मिनेटमा विराटनगरका सुनिल बलको क्रसमा एडिलाजा सोमिडेको हेडर बाहिरिएको थियो ।

सातौं मिनेटमा ललितपुरका मिक्छेन तामाङको फ्रिकिकमा भिलिम पोसिन्कोभिचले बललाई पोस्टको दिशा दिन सकेनन् ।

खेलको १४ औं मिनेटमा विराटनगरका एडिलाजाले गोलको अवसर गुमाए । ललितपुरका गोलकिपर अर्पण कार्कीले फुत्काएको बलमा एडिलाजाले कठिन कोणबाट प्रहार गरेको बलले पोस्टको दिशा लिन सकेन ।

२७ औं मिनेटमा डिबक्स बाहिरबाट विराटनगरका सन्तोष तामाङको प्रहार ललितपुरका गोलकिपर अर्पण कार्कीले सहजै बचाए ।

खेलको ३५ औं मिनेटमा ललितपुरका एरिक विष्टले मैदानको मध्ये भागबाट प्रहार गरेको फ्रिकिक विराटनगरका गोलकिपर किशोर गिरिले उत्कृष्ट बचाउ गरे ।

तर, खेलको ३६ औं मिनेटमा कप्तान अन्जनले गोल गर्दै ललितपुरलाई १-० को अग्रता दिलाए । विमल रानाको प्रहार गोलकिपर किशोरले क्लियर गरेका थिए । उक्त क्लियर गरेको बललाई अन्जनले ड्रप भली प्रहार गर्दै गोलमा परिणत गरे ।

खेलको ५८ औं मिनेटमा सुनिल बलको कर्नरमा विराटनगरका मनिस डाँगीको हेडर ललितपुरका गोलकिपर अर्पण कार्कीले उत्कृष्ट बचाउ गरे ।

६२ औं मिनेटमा दिवाकर चौधरीको क्रसमा पेड्रो मान्जीको फ्री हेडर आकाशिएको थियो ।

खेलको ६३ औं मिनेटमा सब्सिच्युट खेलाडी विमलले गोल गर्दै ललितपुरको अग्रता दोब्बर गरे । डोना थापाको पासमा कप्तान अन्जनले बल अगाडी बढाउदै बक्स भित्र दिएको पासमा विमलले वान टचमा गोल गरेका थिए ।

तर, ललितपुरले दोस्रो गोल गरेपछि खेल तनाव ग्रस्त बन्यो । रेफ्रीको निर्णयमा असन्तुष्ट प्रकट गर्दै विराटनगरका अफिसियलले निर्देशन दिएपछि खेलाडीहरु मैदानबाट बाहिरिएका थिए । तर, केहि समयपछि खेलाडी मैदान फर्किएका थिए ।

७८ औं मिनेटमा पेड्रो मान्जीको प्रहार ललितपुरका गोलकिपर अर्पण कार्कीले मुश्किलले बचाए ।

खेलको ८१ औं मिनेटमा कप्तान अन्जनले व्यक्तिगत दोस्रो गोल गर्दै ललितपुरलाई ३-० को अग्रता दिलाए । कमल श्रेष्ठको फ्रिकिकमा अन्जनले हेडिङबाट उत्कृष्ट गोल गरे ।

खेलको ८५ औं मिनेटमा विराटनगर १० खेलाडीमा समेटियो । रन्जित धिमालको स्थानमा मैदान छिरेका विजय धिमाल दोहोरो पहेलो कार्डसहित रातो कार्ड पाएर मैदानबाट बाहिरिएका थिए । बक्स बाहिर विमललाई तानेर लडाएपछी रेफ्रीले उनलाई दोहोरो पहेलो कार्ड देखाएका थिए ।

त्यसपछि खेलको इन्जुरी समयको छैटौं मिनेटमा नुर्लानले गोल गर्दै ललितपुरलाई ४-० को जित दिलाए । मैदानको मध्ये भागबाट एक्लै अगाडी बढाएको बलमा गोलकिपर किशोर गिरिलाई बिट गर्दै नुर्लानले गोल गरे ।

इन्जुरी समयको सातौं मिनेटमा विमलको पासमा डोना थापाको प्रहार आकाशिएको थियो ।