पोखरासँग पराजित चितवन बाहिरियो

काठमाडौं । एफसी चितवन पहिलो संस्करणको फ्रेन्चाईज फुटबल प्रतियोगिता नेपाल सुपर लिग (एनएसएल) बाट बाहिरिएको छ ।

शुक्रबार भएको खेलमा पोखरा थण्डर्ससँग २-१ गोल अन्तरले पराजित हुँदै चितवन प्रतियोगिताबाट बाहिरिएको हो ।

त्रिपुरेश्वरस्थित दशरथ रंगशालामा सुरुवाती एक गोलको अग्रता जोगाउन नसक्दा चितवन पराजित भएको हो ।

पोखरालाई जित दिलाउन नवयुग श्रेष्ठ र राफायल रिमगागोले एक एक गोल गरे ।

१० खेलाडीमा समेटिएको चितवनका शिशिर लेखिले एक गोल फर्काए ।

रोमान्चक बनेको खेलको पहिलो हाफ गोलरहित बराबरीमा सकिएको थियो । पहिलो हाफमा दुबै टोलीले केहि गोलको अवसर भने सिर्जना गरेको थियो । 

खेलको तेस्रो मिनेटमा पोखराका केचा यान्निकको फ्रि हेडरले पोस्टको दिशा लिन सकेन ।

खेलको छैटौं मिनेटमा चितवनका गोरान जेर्कोभिचले सेकेण्डबार च्याप्दै प्रहार गरेको बल पोस्टको नजिकैबाट बाहिरिएको थियो ।

१२ औं मिनेटमा पोखराका आयुश घलानको हेडर पोस्ट नजिकैबाट बाहिरिएको थियो ।

खेलको १५ औं मिनेटमा चितवनका सुनिल श्रेष्ठले पेनाल्टी क्षेत्र भित्रबाट प्रहार गरेको बल पोखराका गोलकिपर दीप कार्कीले उत्कृष्ट बचाउ गरे ।

१८ औं मिनेटमा पोखराका नितिन थापाले डिबक्स बाहिरबाट प्रहार गरेको बल पोस्ट नजिकैबाट गएको थियो ।

खेलको २७ औं मिनेटमा पोखराका आयुश घलानले गोलको सुनौलो मौका गुमाए । रबि पासवानको क्रसमा पेनाल्टी बक्स भित्र रहेका आयुशको वान टच प्रहारले पोस्टको दिशा लिन सकेन ।

पहिलो हाफको इन्जुरी समयमा बक्स बाहिरबाट रबि पासवानको प्रहार पोस्ट माथिबाट गएको थियो ।

दोस्रो हाफको खेल भने रोमान्चक बन्यो ।

खेलको ५९ औं मिनेटमा चितवनका जर्ज प्रिन्स कार्कीको डिबक्स बाहिरबाटको उत्कृष्ट प्रहार पोखराका गोलकिपर दीप कार्कीले बचाउ गरे ।

७० औं मिनेटमा चितवनका रुप बहादुर लामाले डिबक्सको ठिक बाहिरबाट प्रहार गरेको बल पोस्ट बारमा लाग्दै फर्किएको थियो ।

तर, खेलको ७३ औं मिनेटमा शिशिर लेखिले गोल गर्दै चितवनलाई १-० कोअग्रता दिलाए । उनले बक्स बाहिर मैदानको दायाँ भागमा गरेको सशक्त प्रहार टप पोस्ट बारबाट गोलमा परिणत भएको थियो ।

खेलको ८२ औं मिनेटमा चितवन १० खेलाडीमा समेटियो । गोलकिपर विशाल सुनार रातो कार्ड प्राप्त गर्दै मैदानबाट बाहिरिएका थिए । नितिन थापाको लामो पासमा नवयुग श्रेष्ठ अगाडि बढ्ने क्रममा चितवनका गोलकिपर विशाल सुनार बक्स बाहिर निस्केर हातले बल क्लियर गरेपछि रेफ्री प्रज्वल क्षेत्रीले उनलाई सिधै रातो कार्ड देखाएका थिए ।

विशालको गल्तीसँगै पोखराले डिबक्सको ठिक बाहिरबाट फ्रिकिकको अवसर पायो । त्यहिँ फ्रिकिकमा कप्तान नवयुग श्रेष्ठले ८६ औं मिनेटमा गोल गर्दै पोखरालाई १-१ को बराबरीमा ल्याए ।

त्यसपछि खेलको इन्जुरी समयको चौंथो मिनेटमा रिमगागोले गोल गर्दै पोखरालाई २-१ को महत्वपूर्ण जित दिलाए । उनले रबि पासवानको पासमा उत्कृष्ट गोल गरेका थिए ।

खेलमा पोखराका रबि पासवान प्लेयर अफ दि म्याच चुनिए । उनले २५ हजार प्राप्त गरे ।

इमर्जिङ प्लेयर अफ दि म्याच  चितवनका शिशिर लेखि चुनिए । उनले १० हजार प्राप्त गरे ।

जितसँगै पोखराले ६ खेलमा ८ अंक जोडेको छ । पोखरा तेस्रो स्थानमा उक्लिएको छ ।

जितसँगै पोखराले प्लेअफ पुग्ने सम्भावना बलियो बनाएको छ ।

चितवनले भने ५ खेलमा २ अंक जोडेको छ । चितवन पुछारमा रहेको छ ।

चितवनले अब अन्तिम एक खेल खेल्न बाँकी रहेको छ । उक्त खेल जितेपनि चितवनले शीर्ष चारमा स्थान बनाउने छैन ।