एनएसएल रोकिदैन - सुदिप शर्मा

काठमाडौं । नेपाल स्पोर्टस म्यानेजमेन्टका प्रमुख कार्यकारी अधिकृत शुदिप शर्माले फ्रेन्चाईज फुटबल प्रतियोगिता नेपाल सुपर लिग (एनएसएल) कुनै हालतमा नरोकिने बताएका छन् ।

कोरोनाबाट अन्तराष्ट्रिय खेलकुद प्रभावित भईरहदा एनएसएल प्रमुख शर्माले एनएसएल निर्धारित समयमै आयोजना हुने बताए ।

पहिलो फुटबलको फ्रेन्चाईज प्रतियोगिता बैशाख ११ गतेदेखि जेठ १ गतेसम्म काठमाडौंको दशरथ रंगशालामा सञ्चालन हुँदैछ ।

‘सरकारसंग समन्व्य गरिरहेका छौं । सरकारले जस्तो निर्देशन दिन्छ । त्यही अनुसारको मापदण्ड पुरा गरेर प्रतियोगिता गछौं ।’ शर्माले खेलपाटीसंग भने ।

सिईयो शर्माले दर्शक सहितको प्रतियोगिता आयोजना गर्ने तयारी भईरहेको बताए । उनले दशरथ रंगशालामा ५० प्रतिशत दर्शक राखेर खेलाउने योजना रहेको उल्लेख गरे ।
‘राखेपसंगको समन्वयमा ग्याप गरेर राख्छौं । ५० प्रतिशत मात्र दर्शक राखेर पनि खेलाउने योजना छ ।’ उनले भने ।

शर्माले ५० प्रतिशत दर्शक हुँदै शुन्यमा झरेर भएपनि प्रतियोगिता निर्धारित मितिमै हुने बताए । उनले सरकारले जारी गरेका निर्देशन पालना गरेर प्रतियोगिता अघि बढाउने उल्लेख गरे ।

‘अहिलेसम्म ५० प्रतिशत दर्शक राखेर खेलाउने अवस्थामा छौं । तर अवस्था बिग्रदै गएको खण्डमा र नयाँ निर्देशन आएको खण्डमा स्वरुप परिवर्तन गरेर पनि प्रतियोगिता खेलाउँछौ ।’ शर्माले भने ।

नेपालमा पहिलो पटक हुन लागेको फुटबलको फ्रेन्चाईज प्रतियोगितामा ७ टिम सहभागी छन् । शहरलाई फ्रेन्चाईज गरिएको प्रतियोगितामा ललितपुर सिटी, काठमाडौ रेजर्स, एफसी चितवन, धनगढी एफसी, बुटवल लुम्बिनी, विराटनगर सिटी एफसी र पोखरा थन्डर्स रहेका छन् ।

सहभागी टिमले अक्सनबाट खेलाडी छनोट गरेर सामुहिक अभ्यास समेत सुरु गरिसकेका छन् । अहिले अधिकांश टिमको ध्यान बाहिरबाट राम्रा खेलाडी ल्याउनमा रहेको देखिन्छ । अधिकांश क्लबले छिमेकी भारत हुँदै युरोपबाट विदेशी खेलाडी एनएसएलमा आबद्ध गरेका छन् ।