कसरी सम्भव भयो गोलको खडेरीमा पूर्णविराम ?

काठमाडौं । नेपाली राष्ट्रिय फुटबल टिमको एक परम्परागत समस्या हो,विपक्षी टिमविरुद्ध गोल गर्न नसक्नु ।

नेपाली फुटबललाई यस समस्याले प्राय सताईरहन्छ । जसको कारण नेपाली टिम लामो समय गोलविहीन हुने गरेको छ ।

फिनिसिङमा चुक्दै आएको नेपाली टिमले गोल गर्न नसक्ने कमजोरीलाई अझै सुधार्न सकेको छैन । अखिल नेपाल फुटबल संघ (एन्फा) ले आयोजना गरेको थ्री नेसन्स कप अन्तराष्ट्रिय फुटबलमा समेत नेपालको त्यो कमजोरी कायमै रह्यो ।

पछिल्लो समय नेपाली टिम ७ खेलसम्म गोलविहीन बन्यो । किर्गिस्तानको यू-२३ टिमविरुद्धको खेल जोड्ने हो भने नेपाल ८ खेलसम्म गोलविहीन बन्यो ।

तर, सोमबार नेपाली टिमले गोलविहीन यात्राको अन्त्य गरेको छ । थ्री नेसन्स कपको फाइनलबाट नेपालले गोलको खडेरी अन्त्य गरेको हो ।

त्रिपुरेश्वरस्थित दशरथ रंगशालामा बंगलादेशविरुद्धको फाइनलमा गोल गर्दै नेपालले गोलबिनाको यात्रालाई पूर्णविराम लगाएको हो । बंगलादेशविरुद्ध २-१ को जितसँगै नेपालले थ्री नेसन्सको उपाधि समेत जित्यो ।

करिब १८ महिना अघि विश्वकप छनौटमा नेपालले चाइनिज ताइपेविरुद्ध २-० को जित निकालेको थियो । ताइपेविरुद्ध अन्जन विष्टले दुई गोल गरेपछि नेपालले गोल निकाल्न सकेको थिएन् ।

बंगलादेशविरुद्धको फाइनलमा भने नेपालले १८ औं मिनेटमा गोल निकाल्न सफल भएको थियो ।  कर्नरबाट आएको बल बंगलादेशका डिफेन्डरले क्लियर गरेपछि प्राप्त बलमा  संजोकले डिबक्स भित्रबाट उत्कृष्ट गोल गरेका थिए ।

मिडफिल्डर संजोकको त्यो डेब्यु गोल थियो । संजोकले शनिबार मात्रै बंगलादेशसँगको खेलबाट राष्ट्रिय टिमका लागि डेब्यु गरेका थिए ।

संजोकको गोलसँगै आठ खेलपछि नेपालको गोलको खडेरी तोडिएको थियो । नेपालले ७ सय ६६ मिनेटपछि गोल निकाल्न सफल भयो ।

गोलको खडेरी तोडिएपछि मुख्य प्रशिक्षक बालगोपाल महर्जन पनि खुसी देखिए ।

'१०० दिनको तयारी र प्रतिक्षाको घडी थियो । हामी सफल भयौं,' महर्जनले खेलपछि भनेका थिए ।

गोलको खडेरी तोडिएको दिन नेपालले दुई गोल गरेको थियो । यस्तै एक गोल व्यहोरेको थियो ।

नेपालको लागि दोस्रो गोल विशाल राईको नाममा रह्यो । प्रतियोगिताको सुरुवाती दुई खेलमा प्लेईङ-११ मा मौका नपाएका विशालले फाइनलमा भने सुरुवातबाटै खेलेका थिए ।

विशालले संजोककै पासमा डिबक्स भित्रबाट गोल गरेका थिए । डिफेन्डर रंजित धिमालले उपलब्ध गराएको बलमा संजोकको वान टच पासमा विशालले गोल गरेका थिए ।

नेपालले गोल गर्न नसकेको खेल -

ताइपेपछि नेपालले विश्वकप छनोटमा अष्ट्रेलिया, जोर्डन र कुवेतसँग खेलेको थियो ।

अष्ट्रेलियासँग ५-० ले पराजित नेपाल जोर्डनसँग ३-० र कुवेतसँग १-० ले पराजित भएको थियो ।

त्यस्तै म्यानमारसँगको मैत्रीपूर्णमा नेपाल ३-० ले पराजित भएको थियो ।

नेपालले पछिल्लो पटक बंगलादेशसँग उसैको मैदानमा २ मैत्रीपूर्ण खेल खेल्यो ।

ढाकामा भएको पहिलो मैत्रीपूर्णमा २-० ले पराजित नेपाल दोस्रो खेलमा गोलरहित बराबरीमा रोकिएको थियो ।