लेवान्डोस्कीको ह्याट्रिकमा बायर्नको सहज जित

एजेन्सी । साविक विजेता बायर्न म्युनिखले जर्मन बुन्डेसलिगा फुटबलमा सहज जित निकालेको छ ।

शनिबार राति भएको खेलमा १० खेलाडीमा सिमित बायर्नले स्टुटगार्डलाई ४-० गोल अन्तरले पराजित गरेको हो ।

घरेलु मैदानमा बायर्नलाई जित दिलाउन रोबर्टो लेवान्डोस्कीले ह्याट्रिक पूरा गरे । यस्तै सर्जी जिनाब्रीले एक गोल गरे ।

खेलको १२ औं मिनेटमा अल्फन्सो डेभिसले रातो कार्ड पाएपछि बायर्न १० खेलाडीमा समेटिएको थियो ।

तर, खेलको १८ औं मिनेटमा लेवान्डोस्कीले गोल गर्दै बायर्नलाई अग्रता दिलाएका थिए ।

जिनाब्रीले खेलको २२ औं मिनेटमा गोल गर्दा घरेलु टिमको अग्रता २-० को बन्यो ।

खेलको २३ औं मिनेटमा लेवान्डोस्कीले व्यक्तिगत दोस्रो गोल गर्दै टिमको अग्रता ३-० को बनाए ।

त्यसपछि खेलको ३९ औं मिनेटमा लेवान्डोस्कीले ह्याट्रिक पूरा गर्दै बायर्नलाई ४-० को जित दिलाए ।

जितसँगै बायर्नले २६ खेलमा ६१ अंक जोडेको छ । बायर्न शीर्ष स्थानमा यथावत रहेको छ ।

स्टुटगार्ड ३६ अंक जोडेर आठौं स्थानमा रहेको छ ।

बुन्डेसलिगा अन्तर्गत नै बोरुसिया डर्टमण्ड भने एफसी क्लोनसँग २-२ गोलको बराबरीमा रोकिएको छ ।