त्रिदेशीय फुटबलमा दर्शकलाई अनुमति

काठमाडौं । नेपाल, बंगलादेश र किर्गिस्तानबीचको त्रिदेशीय अन्तराष्ट्रिय फुटबल प्रतियोगितामा दर्शकले रंगशालामा बसेर खेल हेर्न पाउने भएका छन् ।

अखिल नेपाल फुटबल संघ (एन्फा) ले बिहीबार पत्रकार सम्मेलन गर्दै त्रिदेशीय अन्तराष्ट्रिय फुटबल प्रतियोगितामा दर्शकलाई रंगशाला प्रवेशको अनुमति दिईने जनाएको छ ।

तर, कोरोनाको महामारीलाई मध्येनजर गर्दै १२ हजार दर्शकलाई मात्र मैदान प्रवेशको अनुमति हुने एन्फाले जनाएको छ ।

दशरथ रंगशालाको क्षमता १५ हजार रहेको छ ।

एन्फाले प्रतियोगिताको टिकट मूल्य समेत तोकेको छ ।

एन्फाले यस पटक टिकट मूल्यमा वृद्धि गरेको छ ।

एन्फाले सामान्यतर्फ ७ सय र भीआईपीतर्फ १५ सय टिकट दर राखेको छ ।

नेपालले पहिलो खेलमा किर्गिस्तानसँग खेल्नेछ ।

नेपाल र किर्गिस्तानबीचको खेल चैत १२ गते हुनेछ । किर्गिस्तानको यू-२३ टिम हुनेछ ।

प्रतियोगिताको उद्घाटन खेलमा किर्गिस्तान र बंगलादेश खेल्ने छन् । उद्घाटन खेल चैत १० हुनेछ ।

यस्तै दोस्रो खेलमा नेपालले बंगलादेशसँग खेल्नेछ । नेपाल र बंगलादेशबीचको खेल चैत १४ गते हुनेछ ।

राउण्ड रोबिनको आधारमा हुने लिगको शीर्ष दुई टिमले फाइनलमा प्रतिस्पर्धा गर्ने छन् ।

फाइनल खेल चैत १६ गते हुनेछ ।

प्रतियोगितामा कुल ४ खेल हुनेछ ।