रामेछापमा आइटिएफ तेक्वान्दोको राष्ट्रिय एकेडेमी निर्माण

काठमाडौं । रामेछापको खाडाँदेवि गाउँपालिकामा राष्ट्रिय तेक्वान्दो आइटिएफ एकेडेमी निर्माण भएको छ ।

खाँडादेखि गाउँपालिकास्थित गाल्पा बजारमा कुल एक करोड ११ लाख लागतमा एकेडेमी निर्माण भएको हो ।

एकेडेमीले कुल दुई रोपनी क्षेत्रफल ओगटेको छ । चेन्जिङ हल, बाथ रुम, अफिस रूमलगायत सेवासुविधासहितको एकेडेमी निर्माण भएको छ । आइटिएफ तेक्वान्दो महासंघले पनि यस नवनिर्मित एकेडेमीलाई राष्ट्रिय एकेडेमीका रूपमा मान्यता दिएको छ ।

करिब दुई सय खेलाडीले प्रत्यक्ष रूपमा एकेडेमीमा प्रशिक्षण गर्न पाउनेछन् ।

केन्द्र सरकार, प्रदेश सरकार र स्थानीय सरकारको संयुक्त लगानीमा एकेडेमी निर्माण भएको नेपाल अन्तर्राष्ट्रिय तेक्वान्दो महासंघका केन्द्रीय सदस्य एवम् रामेछाप तेक्वान्दो संघका अध्यक्ष रूपसिंह मोक्तानले जानकारी दिए ।

शनिबार एक कार्यक्रमबीच खाडाँदेवि गाउँपालिकाका प्रमुख प्रेमबहादुर तामाङ, दोरम्बा गाउँपालिकाका प्रमुख कमानसिंह मोक्तान र सुनापतिका गाउँपालिका प्रमुख धावा लामालगायतले उक्त एकेडेमीको उद्घाटन गरेका थिए ।

सो अवसरमा खाडाँदेवि गाउँपालिकाकी उपप्रमुख मखमली श्रेष्ठ, खाडाँदेखि गाउँपालिका वडा–७ का अध्यक्ष असलसिंह मोक्तान, एसियाली आइटिएफ तेक्वान्दो महासंघका कार्यकारी सदस्यसमेत रहेका नेपाल आइटिएफ महासंघका अध्यक्ष अञ्जन धमलालगायतको उपस्थिति रहेको थियो ।

तीन गाउँपालिका खाडाँदेवि, दोरम्बा र सुनापतीको संगम स्थल गाल्पा बजारमा एकेडेमी निर्माण गरिएको छ । तीनै गाउँपालिकाले प्रदेश सरकार र केन्द्र सरकारलाई गल्पामा राष्ट्रिय एकेडेमी निर्माणका लागि संयुक्त प्रस्ताव पेश गरेका थिए । सोही अनुरूप तीनै तहका सरकारको प्रयासमा एकेडेमी निर्माण भएको रामेछाप आइटिएफ तेक्वान्दोका अध्यक्ष रूपसिंह मोक्तानले जानकारी दिए ।

‘यो एकेडमीको निर्माण भएपछि स्थानीय तवरबाट प्रतिभावान् खेलाडी उत्पादनमा ठूलो सघाउँ पुग्ने विश्वास लिएका छौं । धुलेमा खेलिरहेका हाम्रा खेलाडीले अत्याधुनिक हलमा खेल्ने पाउँदा उनीहरूको मनोवल पनि उच्च हुनुका साथै खेलस्तरमा पनि सुधार आउँनेछ,’ रूपसिंहले भने ।

उद्घाटनका अवसरमा खाडाँदेवि गाउँपालिका प्रमुख प्रेमबहादुर तामाङले खेल क्षेत्र एकताको प्रतिकसमेत भएकाले तीन वटै गाउँपालिका संयुक्त प्रयासमा एकेडेमी निर्माण गरिएको बताए ।

दक्षिण एसियाली आइटिएफ तेक्वान्दो महासंघका वरिष्ठ उपाध्यक्षसमेत रहेका अञ्जन धमलाले स्थानीय सरकार र यहाँका जनप्रतिनिधिले आइटिएफ तेक्वान्दोको विकास लागि गरेको योगदानप्रति धन्यवाद प्रकट गर्दै यो एकेडेमी निर्माणले प्रतिभावान् खेलाडी उत्पादनमा ठूलो मद्दत पुग्ने विश्वास व्यक्त गरे ।

शनिबार नै एकेडमी निर्माणका क्रममा योगदान दिएका खाडाँदेवि गाउँपालिका अध्यक्ष प्रेमबहादुर तामाङ, वडा–७ का अध्यक्ष असलसिंह मोक्तान, दोरम्बा गाउँपालिका अध्यक्ष कमानसिंह मोक्तान, सुनापति गाउँपालिका अध्यक्ष धावा लामा र महासंघका अध्यक्ष अन्जन धमलालगायतलाई सम्मान गरिएको थियो ।

नेपाल आइटिएफ तेक्वान्दो महासंघको तत्वावधनमा राष्ट्रिय रेफ्री सेमिनारसमेत आयोजना भएको थियो । सातै प्रदेश र दुई विभाग सशस्त्र प्रहरी बलको एपिएफ र नेपाल आर्मीका गरी कुल ८० जनाले रेफ्री प्रशिक्षण कोर्स पूरा गरेका थिए ।

महासंघका उपाध्यक्ष एवम् रेफ्री कमिटीका प्रमुख प्रवीणकुमार कार्कीले एक दिने कार्स लिएका थिए । एकेडेमी उद्घाटनको अवसर जिल्ला स्तरको प्रतियोगितासमेत भएको थियो । चार विधाका प्याटर्न र फाइटतर्पm आठ तौलसमूहका प्रतिस्पर्धा भएका थिए । उक्त प्रतियोगितामा महिलामा करिसा योञ्जन र पुरुषमा निर्मल लामा उत्कृष्ट खेलाडी चयन भए ।

गाल्पा तेक्वान्दो डोजाङ १३ स्वर्ण, १२ रजत र १० कांस्यसहित टिम च्याम्पियन हुँदा सुनापतिका तेक्वान्दो डोजाङ आठ स्वर्ण, ८ रजत र १० कांस्यसहित दोस्रो भयो ।