वेर्नरलाई लय फर्किने विश्वास

एजेन्सी । चेल्सीका स्ट्राइकर टिमो वेर्नरले यस सिजन आफुले गोलको सूखद अनुभव गर्न नपाएको बताएका छन् ।

यस सिजनको प्रदर्शबाट निरास भएका उनले आफुले अझै धेरै गर्न बाँकी रहेको बताएका छन् ।

‘यो सिजन मेरो लागि कठिन महसुस गरिरहेको छु । किनकि म टोलीलाई सहयोग गर्न चाहन्छु,’ जर्मन स्ट्राइकर वेर्नरले भने, ‘म स्कोर गर्न चाहन्छु । यो मेरो कोर्य हो र म स्ट्राइकर हुँ ।’

यसै सिजनको सुरुवातमा उनी जर्मन बुन्डेसलिगा क्लब आरबी लाइपजिगबाट प्रिमियर लिग क्लब चेल्सी आएका थिए ।

वेर्नरले नोभेम्बर र फेब्रुअरीबीच प्रिमियर लिगका १४ खेल खेल्दा कुनै पनि गोल गर्न सकेका थिएनन् । उनले प्रिमियर लिगका २५ खेलमा मात्र पाँच गोल गरेका छन् ।

वेर्नरले प्रिमियर लिगमा आफ्नो डेब्यू सिजनबाट धेरै कुरा सिकेको बताए । उनले सिजन २०२१–२२ मा आफ्नो टोलीलाई गोलको पक्षबाट ठूलो योगदान पुर्याउने विश्वस्त रहेको बताए ।

‘मेरो क्यारियरमा यस्तो पहिले कहिल्यै भएको थिएन,’ उनले भने, ‘खराब परिस्थितिबाट तपाई जहिले पनि धेरै कुरा सिक्न सक्नुहुनेछ । मैले आफैमा विश्वास गर्न, पिचमा सबै चीज दिन, साना लक्ष्यहरूको बारेमा सोच्न मात्र होइन टिमका लागि लड्न पनि सिके ।’

उनले थपे, ‘अब म आशा गर्दछु कि मेरो गोलको खडेरी सकिएको छ र म यस सिजनको अन्त्यसम्म केही थप गोल गर्नेछु ।’

धेरै राम्रो स्ट्राइकरहरू प्रिमियर लिगमा आउँदा पहिलो सिजन आफु अनुकुल बनाउन एक वर्ष लागेका उदाहरण धेरै भएको उनले बताए । त्यस्तै पछिल्लो समय आफ्नो लय फर्किदै गरेको उनको बु्झाइछ ।

वेर्नर बिहीबार राती एनफिल्डमा लिभरपूलसँगको खेलका लागि टोलीमा छन् ।