हालेपलाई हराउँदै सेरेना सेमिफाइनलमा

एजेन्सी । पूर्व विश्व नम्बर एक सेरेना विलियम्स अष्ट्रेलियन ओपन टेनिसको सेमिफाइनलमा प्रवेश गरेकी छिन् ।

मेलबर्नमा मंगलबार भएको क्वाटरफाइनलमा रोमानियाकी सिमोना हालेपलाई हराउँदै सेरेनाले अन्तिम चारमा स्थान बनाएकी हुन् ।

दशौँ वरीयता प्राप्त अमेरिकी खेलाडी सेरेनाले दोस्रो वरियताकी हालेपमाथि ६-३ र ६-३ को सेटमा जित निकालिन ।

३९ वर्षीय सेरेनाको यो ४० औं ग्राण्डस्लाम सेमिफाइनल हो ।

अब सात पटकको च्याम्पियन सेरेनाले सेमिफाइनलमा जापानी खेलाडी नाओमी ओसाकासँग खेल्ने छिन् ।

क्वाटरफाइनलमा चाइनिज ताइपेकी सीहे सु वुईलाई पराजित गर्दै ओसाका सेमिफाइनलमा पुगिसकेकी छिन् ।

तेस्रो वरीयताकी ओसाकाले सुविरुद्ध ६-२ र ६-२ को सेटमा जित निकालेकी थिइन् ।