रेफ्रीको निर्णयमाथि प्रश्नै प्रश्न !

काठमाडौं । अखिल नेपाल फुटबल संघ (एन्फा) को आयोजनामा जारी राष्ट्रिय महिला लिग फुटबलमा रेफ्रीहरुमाथि प्रश्न उठ्न थालेको छ ।

गत माघ ७ गतेबाट सुरु भएको लिगको दोस्रो चरणको खेलहरु जारी रहदा रेफ्रीको निर्णयमाथि प्रश्न उठ्न थालेको हो ।

लिगमा सहभागी टिमका मुख्य प्रशिक्षकहरु रेफ्रीको निर्णयमा प्रश्न गर्न थालेका छन् ।

शनिबार त्रिभुवन आर्मी क्लब र चौदण्डीगढी नगरपालिकाबीचको खेलपछि आर्मीका मुख्य प्रशिक्षक राजु तामाङले खेलमा रेफ्रीहरुले गलत निर्णय गरेको बताए ।

उक्त खेलमा आर्मीले चौदण्डीलाई ९-० गोल अन्तरले हराएको थियो । आर्मीको जितमा रश्मी घिसिङले ४ गोल गरेकी थिइन् ।

तर, त्यस खेलमा टिमले पाएको पेनाल्टीलाई फउलको संज्ञा दिनु र अन्य समय समेत सहायक रेफ्री (लाईन्समेन) बाट गलत निर्णय भएको प्रशिक्षक राजुले बताए ।

‘रेफ्रीको निर्णय विवादास्पद भयो । दिपालाई (दिपा राई) लडाएपछि पाउनुपर्ने पेनाल्टीलाई फउल दियो,’ राष्ट्रिय फुटबल टोलीका पूर्व मिडफिल्डर राजुले भने ।

आर्मी र चौदण्डीबीचको खेलमा मुख्य रेफ्री अस्मिता मानन्धर थिईन् । यस्तै पहिलो सहायक रेफ्रीमा मेरिना धिमाल थिईन् भने दोस्रो सहायक रेफ्रीमा सुनिता राई रहँदा फोर्थ रेफ्रीमा उमा श्रेष्ठ रहेकी थिईन् । रेफ्रि एसेसरमा भने कल्पना शर्मा रहेकी थिईन् ।

पहिलो हाफको निर्धारित ४५ मिनेटमा आर्मीले ३-० को अग्रता बनाएको थियो । थपिएको ३ मिनेटमा चौदण्डी गोलरक्षक दिपशिखा विश्वकर्माले आर्मी तथा राष्ट्रिय महिला फुटबल टोलीकी सदस्य दिपा राईलाई पेनाल्टी बक्समा लडाएपछि रेफ्री अस्मिता मानन्धरले पेनाल्टीको ईशारा गरेकी थिईन् । पछि उनले त्यहि फल भएको निर्णय गर्दै चौदण्डीको पक्षमा निर्णय सुनाएकी थिईन् ।

यस्तै बाँकी समय सहायक रेफ्री र मुख्य रेफ्रीबाट अनावश्यक अफसाईड देखाएको प्रति इंकित गर्दै प्रशिक्षक राजुले यस्ता निर्णयले ठुला र प्रतिस्पर्धात्मक खेलमा समस्या आउने प्रतिक्रिया दिए ।

‘आज त टोली उस्तै थियो । अलि ठुलो खेल र प्रतिस्पर्धात्मक खेलमा यस्ता निर्णयले ठुलो समस्या आउन सक्छ,’ आर्मी क्लबका पूर्व खेलाडी समेत रहेका राजुले भने ।

दोस्रो चरणको पहिलो खेलमै जित निकालेको आर्मी १६ अंकसहित दोस्रो स्थानमा सुरक्षित रहेको छ । एपीएफ शतप्रतिशत जितसहित १८ अंक जोडेर शीर्ष स्थानमा रहेको छ ।

यस अघि विराटनगरसँग पराजित भएपछि पुलिस प्रशिक्षक संजिब जोशीले समेत रेफ्रीको निर्णयले टोलीलाई समस्या आउने प्रतिक्रिया दिएका थिए ।

खेलपछि पोष्ट म्याचमा जोशीले विभागको खेलमा विभागीय रेफ्रीलाई अवसर नदिन समेत अनुरोध गरे ।

‘विभागको खेलमा विभागीय रेफ्रीको निर्णय सहि देखिँदैन । विभागीय खेलमा विभागीय रेफ्री नभए हुन्थ्यो,’ पूर्व गोलरक्षक समेत रहेका जोशीले भनेका थिए ।

पुलिस र विराटनगरबीचको खेल आर्मीका रेफ्री अन्जना राईले संचालन गरेकी थिईन् । उनि नेपालको एक मात्रै फिफा रेफ्री हुन् । उक्त खेलमा उनले पुलिस तीन खेलाडी (रेखा पौडेल, निर्मला विक र मनिषा राउत) लाई पहेलो कार्ड देखाएकी थिईन् ।

एन्फाले महिला लिगको लागि १३ रेफ्रिलाई अवसर दिएको छ । १३ मध्ये दुई मात्रै पुरुष रेफ्री रहेका छन् । जसमा ८ सहायक रेफ्री रहेका छन् भने ५ मुख्य रेफ्री छन् ।

नेपालमा सेन्टर (मुख्य) रेफ्री कम भएसँगै रेफ्री संघले दुई पुरुष रेफ्रीलाई अवसर दिएको थियो ।

महिला लिग खेलाउने मुख्य रेफ्री :
अन्जना राई (फिफा)
अस्मिता मानन्धर
माया लामा
रोजेन खड्गी
उमेश विडारी

सहायक रेफ्री
विना श्रेष्ठ (फिफा)
मेरिना धिमाल
राधिका शाक्य
लक्ष्मी श्रेष्ठ
एलिना ठकुरी
सरस्वती लो
जमुना मगर
सुनिता राई