देवराज र चन्द्रिकाको जोडीलाई उपाधि

काठमाडौं । देवराज राना र चन्द्रिका कठरियाको जोडीले खुल्ला पुरुष डबल ब्याडमिन्टन प्रतियोगिताको उपाधि जितेका छन् ।

कैलालीको गौरिगंगामा शनिबार भएको फाइनलमा विमल चौधरी र उदिप चौधरीको जोडीलाई पराजित गर्दै देवराज र चन्द्रिकाको जोडीले उपाधि जितेको हो ।

उपाधिसँगै देवराज र चन्द्रिकाको जोडीले २० हजार नगद प्राप्त गरेका छन् । उपविजेता बनेका चौधरी जोडीले १० हजारमा चित्त बुझाउदा सेमिफाइनल खेलेका टोलीले ५/५ हजार प्राप्त गरे ।

गौरिगंगा नगरपालिका अन्तर्गत वडा नम्बर ९ को ब्याडमिन्टन हलमा भएको प्रतियोगितामा जित बहादुर देउवा र करण साउदको जोडी तेस्रो भए ।

मसुरिया ब्याडमिन्टन क्लबको आयोजनामा भएको प्रतियोगिता स्वर्गीय श्री गगन सिंह कलेलको चौथो वार्षिक स्मृतिमा सञ्चालन गरिएको हो ।

प्रतियोगितामा २२ टिमले सहभागीता जनाएका थिए ।