सिन्धुपाल्चोक । त्रिपुरा सुन्दरीका अभिषेक गुरुङले तेस्रो चौतारा साँगाचोकगढी मेयरकप तथा प्रथम तोप–२१ ब्याडमिन्टन प्रतियोगिता’ को जिल्ला स्तरिय मेन्स सिंगलको उपाधि हात पारेका छन् ।
मंगलबार साझ सिन्धुपाल्चोकको सदरमुकाम चौतारामा भएको फाइनल खेलमा त्रिपुरा सुन्दरी गाउँपालिकाका अभिषेकले चौताराका सुरेन्द्र श्रेष्ठलाई २–० को सोझो सेटमा पराजित गरे ।
पहिलो सेट २१–१९ ले जितेका अभिषेकले दोस्रो सेट २१–१५ ले जित्न सफल भए ।
जितसँगै अभिषेकले नगद ३० हजार तथा उपबिजेता सुरेन्द्रले नगद २० हजार रुपैयाँ प्राप्त गरे ।
यस्तै सेमिफाइलनमा पराजित रमेश श्रेष्ठ र अजय तामाङले जनही ५ हजार प्राप्त गरे ।
आजनै भएको मेन्स डबल तर्फको पहिलो सेमिफाइनलमा प्रकाश श्रेष्ठ र रमेश श्रेष्ठको जोडीले अजय तामाङ र राज कुमार तामाङको जोडीलाई २–१ सेटमा पराजित गर्दै उपाधि नजिक रहे ।
यस्तै, विहानै भएको दोस्रो मेन्स डबल सेमिफाइनलमा अभिषेक र युवराज अधिकारीको जोडीले सुरेन्द्र श्रेष्ठ र कैलाश घलेको जाडीलाई २–१ ले पराजित गर्दै उपाधि नजिक पुगेका हुन् ।
पहिलो सेट २०–२० ले गुमाएको प्रकाश जोडीले बाँकी दुई सेटमा पुनरागमन गर्दै २१–१० र २१–७ मा जित्न सफल भए ।
यस्तै दोस्रो खेलको पहिलो सेट २०–२२ ले गुमाएको अभिषेकको जोडीले सुरेन्द्रको जोडीलाई पुनरागमन गर्दै २१–११, २२–११ मा हराउन सफल भयो ।
अब दुई जोडी उपाधिका लागि २६ गते भिड्नेछन् ।
चौतारा साँगाचोकगढी नगरपालिकाको मुख्य प्रायोजनमा चलिरहेको प्रतियोगितामा जिल्ला स्तरका लागि पुरुष एकल र युगल तथा राष्ट्रिय स्तरका लागि पुरुष एकल गरि तीन विधामा प्रतिपर्धा सञ्चालन गरिएकाे आयोजकले जनाएको छ ।
पहिलो चरणमा जिल्लाका लागि पुरुष एकल र युगल तथा दोश्रो चरणमा राष्ट्रिय स्तरको पुरुष एकल प्रतियोयगता आयोजना गरिनेछ ।
राष्ट्रिय स्तरको पुरुष एकलतर्फको बिजेताले नगद १ लाख ११ हजार १ सय ११ प्राप्त गर्ने छन् भने उपबिजेताले नगद ५५ हजार ५ सय ५५ प्राप्त गर्ने छन् । यस्तै सेमिफाईनलिस्ट (तृतीय स्थान) दुई जनाले जनही १० हजार प्राप्त गर्ने छन् ।
युगल तर्फ बिजेता जोडीले ४० हजार, उपबिजेता जोडीले ३० हजार र सेमिफाईनलिस्ट दुई जोडीले ५-५ हजार प्राप्त गर्नेछन् ।
कोरोनाको महामारीका कारण प्रतियोगितामा प्रतिस्पर्धा गर्नबाट बञ्चित राष्ट्रिय खेलाडीले पहिलो पटक ठुलो धनराशी रहेको प्रतियोगितामा प्रतिस्पर्धा गर्न गईरहेका छन् ।
कोरोना महामारिकाबीच नेपालमा ब्याडमिन्टन सुरु हुने यस प्रतियागिता पहिलो समेत हाे । विगत ८ महिनायता नेपालमा कुनै पनि प्रतियोगिता आयोजना हुन पाएको छैन ।
