चौतारामा सर्वाधिक धनराशीको ब्याडमिन्टन हुने

काठमाडौं । सिन्धुपाल्चोक जिल्लाको सदरमुकाम चौतारामा 'प्रथम तोप–२१ चौतारा साँगाचोकगढी मेयरकप ब्याडमिन्टन प्रतियोगिता' आयोजना हुने भएको छ ।

आयोजक तोप–२१, चौताराले प्रतियोगिता मंसिर २१ गतेबाट सुरु हुने जनाएको छ । आयोजकले पहिलो पटक जिल्ला सदरमुकाम चौतारामा राष्ट्रिय स्तरको ब्याडमिन्टन प्रतियोगिता गर्न लागेको हो ।

चौतार साँगाचोकगढी नगरपालिका प्रवर्दक रहेको यस प्रतियोगिता नेपालमा आयोजना हुने मध्ये अहिलेसम्मकै सर्वाधिक धनराशीको भएको आयोजकले बताएको छ ।

आयोजकले पहिलो संस्करणमा जिल्ला स्तरिय मेन्स सिंगल र मेन्स डबल तथा दोस्रो चरणमा राष्ट्रिय स्तरीय मेन्स सिंगल प्रतियोगिता संचालन हुने जानकारी गराएको छ ।

जिल्ला स्तरिय प्रतियोगितामा सहभागिताका लागि आयोजकले खेलाडी दर्ता समेत सुरु गरिसकेको छ । आयोजकले १ हजार शुल्क सहित मंसिर १५ गतेसम्म खेलाडी दर्ता समय सिमा तोकेको छ ।

प्रतियोगिताको राष्ट्रिय स्तरीय मेन्स सिंगल विजेताले १ लाख ११ हजार १ सय ११ रुपैंया प्राप्त गर्नेछ भने उपविजेताले ५५ हजार ५ सय ५५ रुपैँया प्राप्त गर्नेछन् ।
यस्तै सेमिफाइनल पुग्ने दुई खेलाडीले ५ हजारका दरले नगद प्राप्त गर्ने आयोजक टिमका अध्यक्ष अशोक कार्कीले खेलपाटीलाई बताए ।

प्रतियोगिताको जिल्ला स्तरिय मेन्स डबल विजेताले नगद ४० हजार र उपविजेताले ३० हजार प्राप्त गर्नेछन् । यस्तै सेमिफाइनलमा पुग्ने दुई खेलाडीले समेत ५ हजार प्राप्त गर्ने आयोजक तोप–२१ ले जनाएको छ ।

यस्तै जिल्ला स्तरीय मेन्स सिंगल विजेताले ३० हजार र उपविजेताले २० हजार प्राप्त गर्दा सेमिफाइनलमा पुग्ने दुई खेलाडीले ५ हजार प्राप्त गर्नेछन् ।

कोरोना महामारिकाबीच नेपालमा ब्याडमिन्टन सुरुहुने यस प्रतियागिता पहिलो समेत हुनेछ । विगत ८ महिना यता नेपालमा कुनै पनि प्रतियोगिता आयोजना हुन पाएको छैन ।

तोप–२१ का अध्यक्ष अशोक कार्कीले स्वास्थ्य मापदण्ड अनुसार प्रतियोगिता आयोजना हुने खेलपाटीलाई जानकारी गराए ।
‘कोरोना महामारीकाबीच हामीले सरकारले भनेजस्तै स्वास्थ्य मापदण्ड अनुसार प्रतियोगिता आयोजना गर्छौं । धेरै भिडभाड नहुने तरिकाले कसरी प्रतियोगिता गर्न सकिन्छ । त्यसकै तयारीमा जुटेका छौंं ।’ कार्कीले खेलपाटीसँग भने ।

प्रतियोगिताको प्रत्यक्ष प्रशारण सामाजिक संजाल फेसबुक र युट्युवबाट समेत हुनेछ ।