राखेपको बोर्ड बैठक दशैं पछि

काठमाडौं । राष्ट्रिय खेलकुद परिषद् (राखेप)को बोर्ड बैठक दशैं पछि मात्र बस्ने भएको छ ।

काठमाडौं उपत्यकामा कोरोना संक्रमण बढेको भन्दै बोर्ड बैठक दशैं पछि मात्र बस्ने भएको हो ।

युवा तथा खेलकुद मन्त्री जगतबहादुर विश्वकर्माले संख्या धेरै भएकाले दशैं अघि बोर्ड बैठक बस्ने सम्भावना नरहेको खेलपाटीलाई बताए ।

‘दशैं अघि बोर्ड बैठक बस्न गाह्रो हुने देखिन्छ । संख्या पनि ठुलो छ । कोरोनाको संक्रमण समेत बढेको छ । दशैंको मुखमा बैठक बस्दा संक्रमण फैलने डर हुन्छ ।’ विश्वकर्माले भने ।

उनले दशैं पछि मात्र बोर्ड बैठक बस्न सकिने अवस्था रहेको बताए ।

मन्त्रीपरिषद्को २९ गते बसेको बैठकले राखेपका ९ जना बोर्ड सदस्य नियुक्त गरेको थियो । प्रधानमन्त्री केपी ओलीले राखेपको बोर्ड सदस्यमा हरी खड्का, मानदेव हजारा, पुरेन्द्र लाखे, राजेश गुरुङ, मोहमद सागिर शेख, नन्दा बस्याल, एकेन्द्र कँुवर, चन्द्रबन्दना राई, सुमित्रा चौधरीलाई मनोनित गरेका थिए ।

यस्तै परिषद् अध्यक्षको रुपमा खेलकुद मन्त्री जगत विश्वकर्माले खेलकुद संघको सिफारिसमा रेनुका श्रेष्ठ र सुवर्णा श्रेष्ठलाई नियुक्त गरेका थिए ।

नयाँ राष्ट्रिय खेलकुद विकास ऐन अनुसार खेलकुद मन्त्री विश्वकर्माले साउन १५ गते ६ जना बोर्ड सदस्य नियुक्त गरेका थिए । मन्त्री विश्वकर्माले बोर्ड सदस्यको रुपमा रिम रानाभाट, इन्दिरा निरौला, गोविन्द भट्टराई, अर्जुन केसी, सम्पन्न श्रेष्ठ र सुवास श्रेष्ठलाई मनोनित गरेका थिए ।

नयाँ ऐनले ३७ सदस्यीय राखेपको बोर्डको परिकल्पना गरेको छ । मन्त्रीपरिषद्ले नयाँ ऐन अनुसार राखेप सदस्य सचिवमा रमेश सिलवाल र उपाध्यक्षमा शिव कोइरालालाई नियुक्त गरिसकेको छ ।

खेलकुद ऐन अनुसार परिषद्को बैठक वर्षमा कम्तीमा दुई पटक बस्ने उल्लेख छ । सदस्य सचिवले अध्यक्ष अर्थात खेलकुद मन्त्रीसंगको परामर्शमा परिषद्को बैठक बस्ने मिति, समय, स्थान र बैठकमा छलफल हुने विषयको सूची सहितको सूचना बैठक हुनु ७ दिन अघि सबै सदस्यलाई पठाउनुपर्ने उल्लेख छ ।

बोर्डले मुख्य रुपमा परिषद्को वार्षिक योजना, कार्यक्रम तथा बजेट स्वीकृत गर्ने ऐनमा उल्लेख छ ।

ऐन कार्यान्व्यनमा आएको झण्डै ४ महिना बित्न लाग्दा समेत बोर्ड बैठक बस्न सकेको छैन ।

बोर्ड बैठकको ढिलाईले परिषद्को कार्यकारी समिति निर्माणदेखि वार्षिक कार्यक्रम तथा बजेट समेत पास हुन सकेको छैन ।

नयाँ ऐनले राखेप सञ्चालनको जिम्मेवारी ७ सदस्यीय कार्यकारी समितिलाई दिएको छ ।

खेलकुद मन्त्री विश्वकर्माले दशैं पछि बस्ने बोर्ड बैठक कार्यकारी समितिका विषयमा निर्णय गर्ने बताए ।

‘दशैं पछि बोर्ड बैठक बस्छ । कार्यकारी समितिको गठन समेत सोही बैठकले गर्छ ।’ उनले भने ।

परिषद्को कार्यकारी समिति ७ सदस्यीय हुने व्यवस्था छ । सदस्य सचिव संयोजक रहने कार्यकारी समितिमा मन्त्रालयका खेलकुद महाशाखा प्रमुख र राखेपका प्रशासन विभाग प्रमुख पदेन सदस्यको रुपमा रहन्छन् ।

कार्यकारी समितिको बाँकी ४ सदस्यमा परिषद् अध्यक्षको रुपमा खेलकुद मन्त्रीले कम्तीमा एक महिला सहित दुई जना र परिषद्ले कम्तीमा एक महिला सहित दुई जना सिफारिस गर्ने उल्लेख छ । आगामी बोर्ड बैठकले परिषद्को कार्यकारी समितिमा रहने २ सदस्यको विषयमा समेत निर्णय लिनेछ ।