सबैले यस्तो मौका विरलै पाउछन्, त्यसैले नेपाली फुटबलमा बालगोपाल महर्जन भाग्यमानी पात्र हुन् । खेलाडी र प्रशिक्षकको रुपमा उनी नेपाली फुटबलका सफल नाम हुन् ।
काठमाडौंमा भएको पहिलो साफ अन्डर १९ फुटबल च्याम्पियनसिप उनले जिताएका थिए, प्रशिक्षकको रुपमा । त्यस लगत्तै नेपालले फुटबलमा एकपछि अर्को सफलता हात पार्यो । बंगलादेशमा बंगबन्धु गोल्डकप र भारतमा साग फुटबलको उपाधि नेपालले जित्यो ।
समयले फेरी महर्जनलाई नयाँ चुनौती थपिदिएको छ । बंगलादेशमा आगामी मंगलबारबाट सुरु हुने साफ च्याम्पियनसिपमा महर्जनले नेपाली टिमको नेतृत्व गर्दैछन्, मुख्य प्रशिक्षकको रुपमा ।
यही सेरोफेरोमा खेलपाटीकर्मी रमेश सुवदीले कार्यवहाक प्रशिक्षक महर्जनसंग राष्ट्रिय फुटबल टिमको तयारी, लक्ष्य र उपाधि यात्राको सम्भावनाको बिषयमा कुराकानी गरेका छन् ।
अन्तिम समयमा आएर राष्ट्रिय फुटबल टिमको कार्यवहाक प्रशिक्षकको जिम्मेवारी पाउनुभएको छ । एउटा ठुलो प्रतियोगिताको मुखैमा मुख्य प्रशिक्षक बन्दा कत्तिको दबाब महशुश गर्नुभएको छ ?
काम लिएपछि दबाव त भैहाल्छ । तर धेरै दबाब महशुश भएको छैन । सम्पूर्ण जिन्दगी फुटबलमा बिताईयो । कहिले खेलाडी कहिले प्रशिक्षक भएर । त्यसैले दबाबको महशुश गरेको छैन् । सुरुमा एक प्रकारको दबाब थियो, त्यसलाई सहजै स्विकार गरिसकेको छु । अहिले म तयारी अवस्थामा छु । मेरो टिम तयार छ । साफ च्याम्पियनसिपको सम्पुर्ण तयारी पुरा भएको छ ।
साफ च्याम्पियनसिपमा नेपालको लक्ष्य के हो ?
विगतको नतिजाले पक्कै निराश बनाउछ, त्यो राम्रो भएको छैन । तर टिमले लगातार तीन महिनादेखि निरन्तर अभ्यास गरिरहेको छ । एसियन गेम्स, थाईल्याण्डको अभ्यास अनुसार जस्तो प्रकारको रिपोर्ट, विश्लेषण, नतिजा प्राप्त छ, त्यसले मलाई आशावादी बनाएको छ । यसपटक पुराना नतिजा भंग हुन्छ । नयाँ कीर्तिमान बन्छ ।
पछिल्लो समय लगभग नेपाली फुटबल गतिविधि शुन्य अवस्थामा रह्यो । यसले नेपाली टिमको प्रर्दशनमा कस्तो असर गर्ला ?
असर त एकदमै पर्छ । लिग नभएको ४ बर्ष भईसकेको छ । यसले सम्पुर्ण खेलाडी, प्रशिक्षक, रेफ्री, क्लबको व्यवस्थापनलाई असर गरेको छ । त्यसको सोझो असर राष्ट्रिय टिममा समेत पर्छ । सोही कारण २–३ वर्षयता राम्रो नतिजा छैन हामीसंग । तर बाहिर लिगहरु राम्रो भईरहेको छ । यो नियमित छ । भारत, बंगलादेश, माल्दिभ्स लगायतले फुटबलमा राम्रो गरेका छन् ।
साफ अगाडी तयारी स्वरुप नेपालले कुनै अन्तराष्ट्रिय मैत्रिपुर्ण खेल खेलेन । नेपालको तयारीलाई के भन्नुहुन्छ ?
तयारी नभएको हैन । विगत ३ महिनाबाट हामीले खेलाडीलाई राखेर निरन्तर तयारी गरिरहेको छौ । एशियन गेमको सहभागिताले समेत गल्ती सुधार गर्ने मौका पाएका छौ । त्यस अगाडी थाईल्याण्डमा समेत दुई अभ्यास म्याच खेल्यौ । एशियन गेम्सपछि नेपालमा समेत राम्रो अभ्यास खेल्यौ । आशा गरौ नतिजा समेत राम्रो आउनेछ ।
लामो समयको प्रतिबन्धपछि फुटबलमा फर्किएको पाकिस्तानसंग समेत एशियन गेम्समा पराजित भयौ । यसले हाम्रो फुटबलको स्तरलाई कस्तो देखाउँछ ?
राम्रो खेल्दा खेल्दै हारियो । पाकिस्तान नराम्रो टिम हैन । तर उसले हाम्रो भन्दा राम्रो खेल्यो । गल्ति भनौँ वा पुराना नतिजालाई सुधार गर्दै साफ च्याम्पियनसिपमा राम्रो नतिजा ल्याउने भन्ने कुरा हो । त्यसमा सबै केन्द्रित भएर प्रयास गरिरहेका छौ । त्यसैले राम्रो नतिजा आउनेमा आशावादी छौ ।
साफमा हामीले कुन खेलाडीबाट बढी अपेक्षा गर्न सक्छौ ?
मैले एक जना दुई जना खेलाडीको नाम भन्दा उचित नहोला । फुटबल समग्रमा टिम गेम हो । त्यसैले सबैको उत्तिकै महत्वपूर्ण भूमिका रहन्छ । सबै खेलाडी सशक्त छन्, राम्रा छन्, प्रतिभावान छन् अनि सबै उत्तिकै महत्वपूर्ण छन् ।
नेपाल फुटबलको पुरानै समस्या हो, गोल गर्न नसक्ने । यो समस्या एशियन गेम्समा समेत देखियो । प्रशिक्षकको रुपमा कत्तिको आशावादी हुनुहुन्छ ?
पछिल्लो समय नेपालले हरेक प्रतियोगितामा पराजय भोग्दै आएको छ । त्यो भनेको गोल गर्न नसक्नुनै हो । विपक्षीलाई पेनाल्टी वा फ्रिकिक दिएर गोल खाईरहेका छौ । अहिले अवसरलाई कसरी गोलमा परिणत गर्ने र सकेसम्म गोल बढी निकाल्ने बिषयमा खेलाडीलाई केन्द्रित गरेको छु । आश गरौ यसपटक धेरै भन्दा धेरै गोल देख्न पाईनेछ ।
नेपालले साफ च्याम्पियनसिपको उपाधि जित्ने आधार के ?
आधार भनेको टिममा नयाँ र पुराना खेलाडीको संयोजन छ । अनुभवी खेलाडी छन् । टिममा भएका सबै खेलाडी प्राविधिक र दिमागी रुपमा निकै प्रशिक्षित छन् । सबै खेलाडी एउटै टिमबाट निरन्तर खेलिरहेको हुनाले जित निकाल्न सहज छ । त्यही अनुसार हामीले आक्रमक फुटबल खेल्छौ । टोटल फुटबलको शैलीलाई लागु गछौ । बढी भन्दा बढी गोलको सिर्जना गछौ । हाम्रो जितको त्यहीनै आधार हुनेछ ।
उमेर समुहको साफ च्याम्पिनसिप जित्नु भयो । बंगलादेश बसाई तपाईकालागि भाग्यमानी देखिदै आईरहेको छ । कसरी लिनुभएको छ ?
यो एउटा संयोगमात्र हो । भाग्यमानी त्यो हुन्छ, जो सक्षम हुन्छ, मेहनत गर्छ । त्यसैलाई हो भाग्यलेसाथ दिने । मेहमत नगरे भाग्य कहाँबाट आउछ र ? बंगलादेशसंग मेरो सम्बन्ध जोडिएको छ । चाहे प्रशिक्षक होस वा खेलाडी । त्यो ठाँउमा धेरै मेहनत गरिएको छ । मेहनतले धेरै राम्रो परिणाम आएको छ । त्योसंगै भाग्यपनि जोडिएको छ । पहिला मेहनत अनि मात्र भाग्यको कुरा आउने हो ।
