भलिबल संघको नयाँ नेतृत्वमा निराेज मास्केको दाबी

काठमाडौं । नेपाल भलिबल संघको आसन्न निर्वाचनमा निरोज मास्केले नयाँ नेतृत्वका लागि उम्मेदवारी दिने भएकी छिन् ।

संघको वर्तमान उपाध्यक्ष रहेकी मास्केले आसन्न साधारण सभामा नयाँ नेतृत्वका लागि अध्यक्ष पदमा उम्मेदवारी दिने बताएकी हुन् ।

‘लामो समयको भलिबलको अनुभव र जिल्लाका साथीहरुको सुझावका आधारमा संघको आगामी नेतृत्वका लागि उम्मेदवारी दिने निर्णय लिएकोे छु ।’ मास्केले खेलपाटीसंग भनिन् ।

संघको वर्तमान कार्यसमितिको चार बर्षे कार्यकाल गत जेठ १ गते सकिएको थियो । कोरोना महामारीका कारण सम्पूर्ण खेलकुद गतिविधि बन्द रहदाँ संघले चुनावी साधारण सभाको मिति तय गरेको छैन ।

राष्ट्रिय खेलकुद विकास ऐन कार्यान्वयनमा आएसंगै नयाँ नियम अनुसार संघहरुको साधारण सभा गराउने राखेपको तयारी छ । संघको साधारण सभाको औपचारिक घोषणा नभएपनि भलिबल संघको नयाँ कार्यसमितिका लागि आन्तरिक गृहकार्य सुरु भैसकेको छ ।

भलिबललाई अहिलेको अवस्थासम्म ल्याई पुर्याउन वर्तमान र विगतका नेतृत्वको ठुलो योगदान गरेको उल्लेख गर्दै उपाध्यक्ष मास्केले राष्ट्रिय खेललाई नयाँ उचाईमा लैजान आफुले अध्यक्षमा उम्मेदवारी दिन लागेको बताईन् ।

‘विगतको नेतृत्वको ठुलो मेहनतले भलिबल आजको दिनसम्म आईपुगेको छ । अब हामीले ग्रासरुटबाट भलिबलको विकास गर्दै व्यवसायीक रुपमा फड्को मार्न आवश्यक छ ।’ उनले भनिन् ।

केन्द्रिय सदस्यको रुपमा भलिबल संघमा प्रवेश गरेकी मास्केले महिला कमिसनको संयोजकको रुपमा गरेको काम उदाहरणीय मानिन्छ । उनले संघको कोषाध्यक्ष र उपाध्यक्षको हैसियतमा समेत काम गरेकी छिन् ।

महिला कमिसनको संयोजकको रुपमा उनले आफ्नै ब्यक्तिगत खर्चमा चितवनको सौराहमा पहिलो पटक राष्ट्रिय महिला बिच भलिबल प्रतियोगिता सञ्चालन गरेकी थिईन् । मास्के नेतृत्वको कमिसनले संघभित्र खेलाडी तथा प्रशिक्षकलाई सम्मान गर्ने कामको समेत थालनी गरेको थियो ।

मास्के कोषाध्यक्ष रहँदा नेपाल भलिबल संघलाई सरकारले बर्षको उत्कृष्ट खेलकुद संघको रुपमा पुरस्कृत समेत गरेको थियो । संघको हिसाब किताव चुस्त दुरुस्त राखेको भन्दै सरकारले भलिबल संघलाई बर्षको उत्कृष्ट संघबाट सम्मानित गर्दै १ लाख रुपैयाँ प्रदान गरेको थियो ।

‘कोषाध्यक्षको रुपमा संघको आर्थिक गतिविधिलाई चुस्त दुरुस्त राख्ने काम गरेका थियौ । संघलाई पहिलो पटक प्यानमा दर्ता गरेर आर्थिक रुपमा ब्यवस्थित र पारदर्शी बनाउने कामको सुरुवात गरेका थियौ ।’ उनले भनिन् ।

मास्केले भलिबल संघको केन्द्रिय तहमा बसेर हासिल गरेको झण्डै डेढ दशकको अनुभवलाई नेतृत्वको हिसाबले भलिबल खेलको विकासमा लगाउने ईच्छा राखेको बताईन् ।

‘संघमा बिताएको झण्डै १२ बर्षको अनुभवलाई भलिबल विकासमा लगाउन चाहेको छु । त्यही कारण आगामी निर्वाचनमा अध्यक्षमा उम्मेदवारी दिने निर्णय गरेकी हुँ ।’ उनले भनिन् ।

उनले राष्ट्रिय खेलको मान्यता पाएको भलिबललाई ग्रासरुटबाट विकास गर्दै व्यवसायीक खेलको रुपमा विकास गर्ने आफ्नो उद्धेश्य रहेको सुनाईन् ।

‘भलिबलको ब्यवसायीकताको बिषयमा हामीले धेरै छलफल गरेका छौ । अब यसलाई लागू गर्ने समय आएको छ । मेरो नेतृत्वमा भलिबल खेललाई पूर्ण ब्यवसायीक रुपमा विकास गर्ने लक्ष्य लिएको छु ।’ उनले भनिन् ।

मास्केले सञ्जय स्मृति प्रतिष्ठान गठन गरेर खेलकुद तथा सामाजिक कार्यमा उत्तिकै सक्रिय छिन् । प्रतिष्ठानले भलिबल खेलमा योगदान गर्ने दुई जना भलिबल खेलाडीलाई हरेक बर्ष ‘सञ्जय स्मृति प्रतिष्ठान सम्मान’बाट नगद सहित पुरस्कृत गर्दै आएको छ ।