युएस ओपन आयोजनाको निर्णय जुनमा

एजेन्सी । यस वर्षको युएस ओपन ग्राण्डस्लाम टेनिस प्रतियोगिता हुने नहुनेबारे जुन महिनामा निर्णय गरिने भएको छ ।

कोरोना भाईरसको महामारी कायम रहेपछि चर्चित प्रतियोगिता युएस ओपन समेत अन्योलमा परेको छ । तर, अमेरिकाको टेनिस एसोसियसनले युएस ओपन आयोजनाको निर्णय जुनमा गर्ने बताएको छ ।

न्युयोर्कमा आयोजना हुने प्रतियोगिता अगष्ट ३१ बाट सेप्टेम्बर १४ सम्म हुने तालिका रहेको छ । तर, कोरोनाको कारण न्युयोर्क शहरमा १० हजार बढी मानिसको ज्यान गईसकेको छ ।

कोरोनाले न्युयोर्कमा सबैभन्दा धेरै महामारीको रुप लिएपछि आगामी मे १५ सम्म लकडाउन गरिएको छ ।

यस्तै युएस ओपन दर्शकबिना आयोजना नगरिने समेत टेनिस एसोसियसनले जनाएको छ ।

कोरोनाकै कारण विम्बल्डन टेनिस दोस्रो विश्व युद्धपछि पहिलोपटक रद्द भएको छ । यस्तै फ्रेन्च ओपन समेत सारिएको छ ।