टाइम्स 'ए' लाई उपाधि

काठमाडौं । धनगढी टाइम्स क्लब 'ए' ले लि–निङ थ्री बाई थ्री वेष्ट बास्केटबल अन्तर्गत धनगढी लेगको उपाधि जितेको छ ।

सुदुरपश्चिमाञ्चल एकेडेमीको बास्केटबल कोर्टमा भएको फाइनलमा राष्ट्रिय खेलाडी मबिन्द्र क्षेत्री सम्मिलित टाइम्स 'ए' ले सुदुरपश्चिम फाउण्डेशनलाई २०–१४ ले हरायो ।

उपाधिसँगै टाइम्स थ्री बाई थ्री वेष्टको फाइनल्सको लागि छनोट भएको छ । उपविजेता सुदुरपश्चिम पनि फाइनल्सको लागि छनोट भएको छ ।

यसअघि धनगढीमै हुने भनिएपनि प्राविधिक कारणले फाइनल्स पोखरामा सारिएको आयोजक नेपाल बास्केटबल प्राइभेट लिमिटेडले जानकारी दिएको छ । फाइनल्स बिहिबार र शुक्रबार पोखरा रँगशालाको बास्केटबल कोर्टमा हुनेछ ।

पोखरा लेगबाट कास्की बास्केटबल संघ र रामघाट फाइनलका लागि छानिएका थिए भने बुटवलबाट टाइम्स क्लबकै अर्को टोली र न्यु होराइजन क्लब छनोट भएका हुन् । कास्कीले पोखरा र टाइम्स बी ले बुटवलको उपाधि जितेको थियो ।

फाइनलका बिजेता र उपबिजेताहरुले क्रमशः ५० हजार र २५ हजार नगद पुरस्कार प्राप्त गर्नेछन् ।