पोखरा । कास्की बास्केटबल संघको टिमले लिनिङ थ्री बाई थ्री वेष्ट बास्केटबल अन्तर्गत पोखराको उपाधि जितेको छ ।
पोखरा रंगशालाको बास्केटबल कोर्टमा मंगलबार भएको फाइनलमा कास्कीले रामघाटलाई १६–१४ ले पराजित गर्यो ।
उपाधिसँगै कास्की धनगढीमा हुने प्रतियोगिताको फाइनल चरणको लागि छनोट भएको छ । उपविजेता रामघाट पनि फाइनल चरणमा पुगेको छ ।
प्रतियोगिता अन्तर्गत अब बुटवल र धनगढीमा प्रतिस्पर्धा हुनेछ । बुटवल लेग माघ ४ गते हुनेछ भने धनगढी लेग माघ ६ गते सम्पन्न हुनेछ । दुवै शहरबाट फाइनल पुग्ने दुई–दुई टोली माघ ८ र ९ गते हुने फाइनलमा भिड्नेछन् ।
फाइनल चरणको विजेताले ५० हजार र उपविजेताले २५ हजार पुरस्कार प्राप्त गर्नेछन् ।
पोखरामा सहभागि टोलीहरुलाई डबल एलिभिनेसन राउण्डमा खेलाइएको थियो । योङ ब्रदर्श र एलसी ब्रदर्श सेमिफाइनल पुग्ने अन्य दुई टोली रहेका थिए । सेमिफाइनलमा कास्कीले योङ ब्रदर्शलाई २१–१७ र रामघाटले एलसी ब्रदर्शलाई १७–१५ ले पराजित गरेका थिए ।
नेपाल बास्केटबल लिग प्राइभेट लिमिटेडले यसअघि एनबिएल इस्टको आयोजना गरेको थियो । एनबिएलले थ्री बाई थ्री सेन्ट्रलको पनि आयोजना गर्नेछ ।
