काठमाडौं । नेपाल राष्ट्रिय तथा अन्तर्राष्ट्रिय खेलाडी संघ (एनएनआईपीए) ले नेपालमा सम्पन्न १३ औं दक्षिण एसियाली खेलकुद (साग) मा टिम इभेन्टमा रजत र कास्य पदक विजेता खेलाडीलाई तत्काल पुरस्कार घोषणा गर्न सरकार र राष्ट्रिय खेलकुद परिषदसँग माग गरेको छ ।
संघले मंगलबार प्रेस विज्ञप्ति निकाल्दै सरकारले व्यक्तिगततर्फको स्वर्ण, रजत र कास्य जित्ने तथा टिम इभेन्टमा स्वर्ण जित्नेलाई मात्र पुरस्कारको घोषणा गरेको भन्दै टिमतर्फ रजत र कास्य विजेतालाई पनि तत्काल पुरस्कारको घोषणा गर्न माग गरेको हो ।
'व्यक्तिगत स्पर्धाका स्वर्ण, रजत र कांस्य विजेता खेलाडीका लागि पुरस्कार घोषणा भएपनि टिम खेलका रजत र कांस्य जित्नेलाई पुरस्कारमा प्रष्ट सम्बोधन नभएकोमा भने हाम्रो ध्यानाकर्षण भएको छ,' अध्यक्ष दीपक श्रेष्ठले जारी गरेको विज्ञप्तिमा भनिएको छ, 'सरकार तथा राष्ट्रिय खेलकुद परिषदलाई हामी टिम खेलका रजत र कांस्य पदक जित्नेको पुरस्कार पनि तत्काल घोषणा गरेर खेलाडीको मनोबल घट्न नदिन अनुरोध गर्न चाहन्छौं ।'
सरकारले गत मङ्सिर २८ गते सागका विजेतालाई आकर्षक पुरस्कारको घोषणा गरेको थियो । प्रधानमन्त्री केपी शर्मा ओलीले बुधबार बालुवाटारमा व्यक्तिगततर्फ स्वर्ण पदक विजेतालाई जनही ९ लाख, रजतलाई ६ लाख र कास्यलाई ३ लाख दिने घोषणा गरेको थियो ।
यस्तै १ भन्दा बढी स्वर्ण पदक ल्याउने खेलाडीलाई ११ लाख, टिम इभेन्टमा स्वर्ण ल्याउने खेलाडीलाई जनही ५ लाख र प्रशिक्षकलाई पनि ५ लाख प्रदान गरिने जनाएको थियो ।
तर, टिम इभेन्टमा रजत र कास्य जित्नेलाई पुरस्कारको घोषणा गरिएको थिएन् ।
सागमा नेपालले ५१ स्वर्ण पदक जितेको थियो । त्यस्तै नेपालले ६० रजत र ९५ कास्यसहित कुल २ सय ६ पदक जितेको थियो ।
प्रेस विज्ञप्ति -
आदरणीय पत्रकार मित्रहरु,
दक्षिण एसियाली खेलकुदको सबभन्दा ठूलो खेल मेला दक्षिण एसियाली खेलकुद (साग) को १३औं संस्करण राष्ट्रिय गौरवको महोत्सवका रुपमा यही डिसेम्बर १ देखि १० सम्म नेपालमा सम्पन्न भएको छ ।
अन्तर्राष्ट्रिय जगतमा नेपालको इज्जत र प्रतिष्ठा अझ माथि उचाल्न भर्खरै सम्पन्न साग सफल भएको हाम्रो ठहर हो । नेपालले इतिहासमै सबभन्दा बढि ५१ स्वर्ण, ६० रजत र ९५ कांस्य पदक सहित कुल २ सय ६ पदक जित्दै यो सागमा नेपालले दोस्रो स्थान हासिल गरेको सबैमा जानकारी भएकै विषय हो ।
आफैले आयोजना गरेको दक्षिण एसियाली खेलकुदको सबभन्दा ठूलो कुम्भ मेलामा देशलाई सर्बाधिक पदकका साथ ऐतिहासिक रुपमा दोस्रो स्थान दिलाउन नेपाली खेलाडीको मेहनत, परिश्रम र संघर्षको जति प्रशंसा गरे पनि कम हुन्छ । सिमित स्रोत र साधनका बावजुद नेपाली खेलाडीले १३औं सागको सफलतामा गरेको योगदान अतुलनीय रहेको सम्पूर्ण नेपाली खेलाडीहरुको छाता संगठन नेपाल राष्ट्रिय तथा अन्तर्राष्ट्रिय खेलाडी संघले ठहर गरेको छ ।
सन २०१६ को फेब्रुअरीमा दुई वर्षभित्र १३औं संस्करण आयोजना गर्ने बाचा सहित भारतबाट झण्डा लिएर फर्किएपछि समयमा साग आयोजना गर्न नसक्दा पटक पटक नेपालको इजजत माथि धब्बा लागेको थियो । पटक पटक मिति सारिरहेको अवस्थामा १३औं साग नै होला की नहोला भन्ने अवस्थामा राष्ट्रिय खेलकुद परिषदको वर्तमान नेतृत्वले दिनरात मेहनत गरेर सफलतापूर्वक साग सम्पन्न गरेको पनि हामीले विर्सन मिल्दैन ।
वर्तमान सरकार र राखेपको नेतृत्वले यसरी असम्भवझै देखिएको साग आयोजनालाई सम्भव नबनाएको भए हाम्रा खेलाडीले राष्ट्रिय गौरवका गाथाहरु रच्न पाउने थिएनन् । खेलाडीले आफूलाई अन्तर्राष्ट्रिय प्रतिस्पर्धाको मञ्चमा जाच्ने मौका पनि पाउने थिएनन् । प्रत्येक खेलाडीका लागि प्रतियोगिताको अत्यन्तै ठूलो महत्व हुने गर्छ । वर्षौसम्म खेलाडीले अभ्यासमा बगाएको पसिनाको मुल्य र ओझ यस्तै प्रतियोगितामा जाच्ने गरिन्छ । यहीँबाट राष्ट्रिय नायकका रुपमा स्थापित भइन्छ । सफलता हासिल नभए, अर्को पटकका लागि त्यसलाई साचिन्छ । त्यसैले खेलाडीलाई यस्तो अमुल्य अवसर जुटाइ दिएकोमा संघ सम्पूर्ण खेलाडीका तर्फबाट नेपाल सरकार, राष्ट्रिय खेलकुद परिषद र नेपाल ओलम्पिक कमिटी प्रति आभार प्रकट गर्न चाहन्छ ।
वर्तमान सरकार र खासगरी सम्माननीय प्रधानमन्त्रीज्युले खेलाडीको हौसला अभिवृद्धिका लागि आकर्षक पुरस्कारको घोषणा गर्नुभएको छ । त्यसलाई हामी खेलाडी संघ स्वागत गर्न चाहन्छौं । व्यक्तिगत स्पर्धाका स्वर्ण, रजत र कांस्य विजेता खेलाडीका लागि पुरस्कार घोषणा भएपनि टिम खेलका रजत र कांस्य जित्नेलाई पुरस्कारमा प्रष्ट सम्बोधन नभएकोमा भने हाम्रो ध्यानाकर्षण भएको छ ।
ऐतिहासिक रुपमा साग आयोजना गर्नुका साथै खेलाडी र खेलकुदलाई अघि बढाउन महत्वपूर्ण काम गर्दै आएको सरकार तथा राष्ट्रिय खेलकुद परिषदलाई हामी टिम खेलका रजत र कांस्य पदक जित्नेको पुरस्कार पनि तत्काल घोषणा गरेर खेलाडीको मनोबल घट्न नदिन अनुरोध गर्न चाहन्छौं ।
नेपाली खेलकुदमा विगतमा पनि सरकारबाट घोषणा भएका पुरस्कार पाउन खेलाडीले लामो समयसम्म प्रतिक्षा गर्नुपरेका थुप्रै घटना छन् । त्यसैले यसपाली वर्तमान खेल नेतृत्वबाट विगतमा साग सकिएको एक सातामै खेलाडीलाई पुरस्कार दिने घोषणा भएझै तत्काल घोषित रकम उपलब्ध गराउन अनुरोध गर्न चाहन्छौं ।
दीपकश्रेष्ठ
अध्यक्ष
नेपाल राष्ट्रिय तथा अन्तर्राष्ट्रिय खेलाडी संघ
