काठमाडौं । साग सकिएको भालीपल्टै प्रधानमन्त्रीले पदक विजेता खेलाडीलाई बालुवाटार बोलाए । पदक जितेका खेलाडीको हौसला बढाउन उनले सबै पदक विजेता खेलाडी तथा खेल संघका पदाधिकारीलाई बालुवाटार डाकेका थिए ।
स्वास्थ्यमा समस्या देखिएपछि प्रधानमन्त्री सार्वजनीक कार्यक्रममा देखिएका छैनन् । पेटको शल्यक्रिया सकेर आराम गरिरहेका उनलाई संक्रमण हुने डर छ । सोही कारण बुधबार उनले खेलाडी तथा अफिसियलसंग हात पनि मिलाएनन् । बेग्लै कुर्सीमा बसेर पदक विजेता खेलाडीलाई सम्बोधन गरे, फोटो खिचाए ।
उनको खेलाडीलाई बालुवाटार बोलाउने अर्को खास कारण ‘सरप्राईज’ प्याकेजको घोषणा गर्न थियो ।
हुन त उनी सागको उद्घाटन अघिनै खेलाडीलाई विशेष सम्बोधन गरेर प्याकेज घोषणा गर्न चाहन्थे । तर पेटको शल्यक्रियाले उनी कार्यक्रममा सहभागी हुन सकेनन् ।
प्रधानमन्त्रीले अर्थमन्त्रीलाई कार्यक्रममा पठाए । प्रधानमन्त्रीबाट कुनै संकेत नपाएका अर्थमन्त्रीले सम्बोधन त गरे, तर प्याकेज घोषणा गर्न सकेनन् ।
बिरामीकै कारण प्रधानमन्त्रीले सागको उद्घाटन देख्न पाएनन् । अस्पतालको बेडबाटै सागको उद्घाटन हेरेर बसे । प्रधानमन्त्रीलाई समापनमा ल्याउन खेलकुद मन्त्रालय र राखेपले हरसम्भव प्रयास गरे ।
सोही कार्यक्रमबाट विशेष प्याकेज घोषणा गर्ने तयारी थियो । तर भर्खरै सल्यक्रिया सकेका प्रधानमन्त्रीलाई संक्रमणको डर छ । सोही कारण उनी समापनमा समेत उपस्थित हुन सकेनन् । समापन समारोहमा उनको भिडियो सन्देश देखाईएको थियो ।
लगत्तै भोलीपल्ट प्रधानमन्त्रीले खेलाडीलाई विशेष सम्बोधन गर्न बालुवाटार डाकेका थिए । करिब आधा घण्टा सम्बोधन गरेका उनले नेपालको ईतिहासदेखि नेपाली खेलकुदको चर्चा गरेका थिए । कीर्तिमानी पौडीबाज गौरिका सिंहलाई आफुपनि ‘स्विमर’ भएको जानकारी गराउन भ्याए । सम्बोधनको समापन गर्दै ठट्यौली पारामा खेलाडीलाई चिया, खाज सोधे । तर खेलाडी विशेष प्याकेज सुन्न चाहन्थे ।
अनि उनले सरकारकातर्फबाट बिशेष प्याकेज घोषणा गरे ।
उनले व्यक्तिगत स्पर्धामा कास्य जित्ने खेलाडीबाट पुरस्कार रकमको घोषणा गरे । उनले कास्यधारी खेलाडीलाई चार लाख दिने बताए । हल तालीले गुन्जयमान बन्यो । रजतलाई ६ लाख घोषणा गरे । अनि स्वर्णकारी खेलाडीलाई ९ लाख दिने बताए । लगत्तै उनले एक भन्दा बढी स्वर्ण जित्ने खेलाडीलाई ११ लाखका दरले रकम पाउने उद्घोष गरे ।
सबैभन्दा ठुलो कन्फ्युजन एक भन्दा बढी स्वर्ण जित्ने खेलाडीले पाउने पुरस्कारमा देखियो ।
प्रधानमन्त्रीले ११ लाखका दरले घोषणा गरे । तर सदस्य सचिव रमेश सिलवालले जति स्वर्ण जितेपनि ११ लाख खेलाडीले पाउने जानकारी गराए ।
‘राज्यको ढुकुटीले प्रति स्वर्ण ११ लाख दिन सक्दैन ।’ पत्रकारसंग उनी भन्दै थिए ।
यसअघि सरकारले १२ औ सागको स्वर्ण विजेतालाई ५ लाख, रजतलाई ३ लाख र कास्यलाई २ लाख दिएको थियो । यसपटक पुरस्कार राशीमा झण्डै दोब्बरले वृद्धि गर्दै सरकारले पुरस्कार रकम घोषण गर्यो ।
प्रधानमन्त्री पुरस्कार घोषणमा अघि बढ्दै गए । उनले टिम ईभेन्टमा स्वर्ण जित्ने खेलाडीलाई ५ लाख घोषणा गरे । तर रजत र कास्यको पुरस्कार राशीमा अड्किए । केही बेर मञ्चै अन्यौलता देखियो । कार्यक्रम केहीबेर रोकियो । प्रधानमन्त्रीले नमिलेका कुरा पछि मिलाउने भन्दै कार्यक्रमलाई अन्त्य गर्न लागे । उनले टिम ईभेन्टमा रजत र कास्य जित्ने खेलाडीले पाउने पुरस्कारको घोषणा गर्न सकेनन् ।
यसअघि १२ औं सागको टिम ईभेन्टका स्वर्ण विजेताले ३ लाख, रजतले २ र कास्यले १ लाख पाएका थिए ।
प्रधानमन्त्रीको बिशेष प्याकेज सुन्न बालुवाटार पुगेका टिम ईभेन्ट्सका खेलाडी निशाश बने । फुटबलमा स्वर्ण जितेका खेलाडीलाई प्रधानमन्त्रीको सम्बोधनले चित्त बुझेन ।
उनीहरुले चित्त दुखाए । अरु रजत र कास्य जित्ने खेलाडीले पुरस्कार समान हुनुपर्ने भन्दै सदस्य सचिवसंग गुनासोनै गरे ।
खेलाडीमा देखिएको पुरस्कारको अन्यौलता न त सदस्य सचिवले प्रष्ट पार्न सके, न त खेलकुद मन्त्रीले बुझाउन सके ।
तयारी बिना गरिएको सम्बोधनले खेलाडीलाई निराशमात्र बनायो । विशेष प्याकेज भनेर हल्ला गरिएपनि सरकार पदक विजेता खेलाडीलाई दिने पुरस्कारमा स्पष्ट रैनछ भन्ने देखायो ।
अब के हुन्छ त ?
खेलकुद मन्त्री जगत विश्वकर्माका अनुसार प्रधानमन्त्रीको सम्बोधन अनुसार खेलाडीले पुरस्कार पाउने बताउँछन् । उनले पुरस्कार रकममा कुनै अन्यौलता नदेखिएको भन्दै प्रधानमन्त्रीको घोषणा अनुसार कार्यविधि बन्ने बताए ।
'खेलाडीलाई उत्साही गरौ भनेर प्रधानमन्त्रीबाट घोषणा भएको हो । छुटेका बिषय कार्यविधिमा समावेश हुन्छ । प्रधानमन्त्रीको सम्बोधनलाई कार्यविधिमार्फत मन्त्रीपरिषद्ले पारित गर्नेछ ।' उनले भने ।
-1732534788.jpg)
