काठमाडौं । १३ औं दक्षिण एसियाली खेलकुद प्रतियोगिता (साग)को औपचारिक समापन भएको छ ।
नेपालले तेस्रो पटक आयोजना गरेको प्रतियोगिता औपचारिक रुपमा मंगलबार समापन भएको हो ।
कार्यक्रमलाई सम्बोधन गर्दै साग ओलम्पिक काउन्सिलका अध्यक्ष जीवनराम श्रेष्ठले सबैको सहयोग र मेहनतले प्रतियोगिताको सफल आयोजना गर्न सहयोग पुगेको बताए ।
उनको प्रत्यक्ष र अप्रत्यक्ष रुपमा आयोजनामा सहयोग गर्ने सबैमा धन्यवाद दिए ।
यस्तै राखेप सदस्य सचिव रमेश सिलवालले सागको आयोजना सुरुवातमात्र भएको बताउँदै अझ ठुला प्रतियोगिताको आयोजना गर्न आफुहरु सक्षम रहेको बताए ।
उनले साग आयोजनाले नेपाल र नेपालीले संसारलाई गर्न सक्छ भनेर देखाउन सफल भएको उल्लेख गरे ।
उनले साग आयोजनालाई सफल बनाउने खेलाडी, प्रशिक्षक तथा खेलकुदका संघहरुलाई विशेष धन्यवाद दिए ।
साग खेलकुदले देशभर खुसी, उर्जा र हाँसो बढेको उल्लेख गर्दै खेलाडीको मेहनतले स्वर्ण पदक जित्न सफल भएको बताए ।
उनले प्रधानमन्त्रीले बुधबार बालुवाटारमा बिशेष कार्यक्रमको आयोजना गरेर खेलाडीलाई आकर्षक प्याकेज घोषणा गर्ने बताए । सदस्य सचिव सिलवालले साग आयोजनाबाट नेपालले विजयको झण्डा फर्फराएको बताए ।
खेलकुद मन्त्री जगत विश्वकर्माले साग आयोजनामा सहयोग पुर्याउने सबैमा धन्यबाद दिए ।
प्रमुख अतिथी उपप्रधान मन्त्री ईश्वर पोखरेलले ऐतिहासिक रुपमा तेस्रो पटक सागको आयोजना गर्न नेपाल सफल रहेको बताए । उनले साग आयोजनामा सहयोग गर्ने खेलाडी, प्रशिक्षक र व्यवस्थापकलाई सरकारकातर्फबाट विशेष धन्यवाद ज्ञापन गरे ।
उनले साग आयोजनाले जनामा बढेको उत्साहलाई अझ बढाउन सरकार प्रतिबद्व रहेको उल्लेख गरे ।
उपप्रधानमन्त्री पोखरेलले आर्थिक कारणले खेलाडीलाई पछुताउने नबनाउन आवश्यक नीति र नियम बनाउने प्रतिबद्वता ब्यक्त गरे ।
नेपालका मुख्य तीन शहरमा १० दिनसम्म सञ्चालन भएको प्रतियोगितामा कुल २६ खेलमा दक्षिण एसियाका ७ राष्ट्रले प्रतिस्पर्धा गरेका थिए ।
सन् १९८४ मा नेपालबाट सुरु भएको सागको आठौं संस्करण सन् १९९९ मा काठमाडौंमा भएको थियो । झण्डै २० बर्षपछि नेपालले सागको १३ औं संस्करण आयोजना गर्न सफल भएको छ ।
अन्तिम दिन नेपालले पुरुष फुटबलमा स्वर्ण जित्दै कीर्तिमानी ५१ स्वर्ण सहित प्रतियोगिताको अन्त्य गरेको हो ।
त्रिपुरेश्वरस्थित दशरथ रंगशालामा एक समारोहको आयोजना गरेर सागको औपचारिक समापन गरिएको थियो ।
पाकिस्तानलाई झण्डा हस्तान्तरण
यस्तै, १४ औं साग आयोजनाको जिम्मेवारी पाएको पाकिस्तानलाई झण्डा हस्तान्तरण गरिएको छ ।
नेपाल ओलम्पिक कमिटि एनओसीका अध्यक्ष जीवनराम श्रेष्ठले पाकिस्तान ओलम्पिक कमिटिका अध्यक्ष सइद आरीफ हेसनलाई १४ औं साग आयोजनाको झण्डा हस्तान्तरण गरेका हुन् ।
दक्षिण एसियाली ओलम्पिक काउन्सिलको बैठकले आगामी संस्करणको साग आयोजनाको जिम्मेवारी पाकिस्तानलाई दिने निर्णय गरेको थियो ।
सोही अनुसार पाकिस्तानका ओलम्पिक कमिटिका अध्यक्षले साग आयोजनाको झण्डा लिएका हुन् । पाकिस्तानले ६ महिना भित्र १४ औं सागको मिति तय गर्नेछ ।
उनले पाकिस्तानले यसअघि सागको सफल आयोजना गरेको उल्लेख गर्दै भब्य रुपमा १४ औं साग आयोजना गरिने बताए ।
नेपालले सफलतापुर्वक साग आयोजना गरेकोमा धन्यवाद दिदै १४ औं सागमा स्वागत गर्न आफु तयार रहेको बताए ।
