काठमाडौं । नेपाली ट्रयाक एन्ड फिल्डमा पूर्व धावक राजेन्द्र भण्डारी सफल मानिन्छ । सँगै विवादित पनि ।
श्रीलंकाको कोलम्बोमा सन् २००६ मा भएको दशौँ दक्षिण एसियाली खेलकुद (साग) मा राजेन्द्रले ५ हजार मिटर दौडमा स्वर्ण पदक जितेका थिए। तर, पछि डोपिङमा परेपछि उनको पदक खोसिएको थियो । राजेन्द्र कुन विषयमा डोपिङमा परे त्यो अझै रहस्यमा छ ।
राजेन्द्रले श्रीलंकामा स्वर्ण जितेपछि उक्त स्पर्धामा नेपालले सागमा स्वर्ण ल्याउन सकेको थिएन् । तर, शुक्रबार गोपीचन्द्र पार्कीले नेपाललाई ५ हजार मिटरमा स्वर्ण दिलाए ।
त्रिपुरेश्वरस्थित दशरथ रंगशालामा भारत र नेपालकै हरि रिमाललाई पछि पार्दै गोपीले स्वर्ण जिते ।
गोपीले ५ हजार मिटर दौडमा स्वर्ण जितेसँगै नेपालले १३ वर्षपछि राजेन्द्रबाट खोसिएको स्वर्ण फिर्ता ल्याउन सफल भयो ।
राजेन्द्रको स्वर्ण फिर्ता ल्याउन भने गोपीको मेहेनत र इख दुवै छ ।
'दशौं सागमा भण्डारी सर (राजेन्द्र भण्डारी) ले पदक ल्याएर पनि डोपिङमा परेपछी फिर्ता भयो । त्यो समाचार भाइरल भएको थियो र स्कुलमा सरले यसबारे बताउँदा मैले एथ्लेटिक्स खेल बुझेको थिए,' स्वर्ण जितेपछि गोपीले सुनाए, 'पदक खोसिएछ अब म ल्याएर देखाउँछु भनेर इख बस्यो ।'
स्वर्ण जित्ने क्रममा गोपीले निर्धारित दुरी १४ मिनेट ५४.२० सेकेन्डमा पूरा गरे । पार्कीले जितेको स्वर्ण नेपालले मध्यम दूरीको दौडमा जितेको पहिलो स्वर्ण पदक हो ।
तर, खोसिएको पदक फिर्ता ल्याउन गोपीले १४ वर्ष मेहेनत गरेका छन् ।
'दौडिएपछि मैले ५ किमीमा राष्ट्रको लागि खोसिएको पदक फिर्ता गर्नु पर्छ भन्ने लाग्यो । म्याराथनमा त हाम्रो पदक छँदै छ भनेर मैले ५ किमी नै खेल्न फेरी तल झरें । आजसम्म १४ वर्षको तयारिमा यो पदक हात पारे,' गोपीले भने ।
गोपीले भारत र श्रीलंकाका कठिन प्रतिद्वन्दीविरुद्ध योजना बनाएर दौडिएकोले स्वर्ण जित्न सफल भएको बताए ।
यस्तै गोपीको अबको लक्ष्य भनेको बैकुण्ठ मानन्धरको कीर्तिमान तोड्नु रहेको छ । त्यसको लागि उनले तयारी गरिसकेका छन् ।
'बैकुण्ठ गुरुले कीर्तिमान नेपालीले नै भंग गरोस भन्ने सोच्नु भएको छ अबको लक्ष्य भनेको उहाको कीर्तिमान ब्रेक गर्ने हो । अब म्याराथनमा जान्छु ,' गोपीले लक्ष्य सुनाए ।
