काठमाडौं । युवा तथा खेलकुदमन्त्री जगतबहादुर सुनार (विश्वकर्मा) ले आइतबारबाट सुरु हुने १३ औं दक्षिण एसियाली खेलकुद (साग) को सञ्चालन र व्यवस्थापनको सम्पूर्ण तयारी पुरा भएको बताएका छन् ।
रिपोर्टर्स क्लबले बिहिबार आयोजना गरेको कार्यक्रममा बोल्दै मन्त्री विश्वकर्माले १३ औं सागको सम्पूर्ण काम सकिएको स्पष्ट पारे ।
‘मंसिर १५ गते साँझ ५ बजे दशरथ रंगशालामा राष्ट्रपतिज्यूले सागको उद्घाटन गर्नुहुनेछ,’ मन्त्री विश्वकर्माले भने ।
मन्त्री विश्वकर्माले अहिले देश तथा विदेशबाट सागमा भाग लिन आउने विशिष्ट पाहुना तथा अतिथिहरुलाई स्वागत गर्न आफूहरु व्यग्र प्रतिक्षामा रहेको बताए ।
१३ औं साग अन्तर्राष्ट्रिय महत्वको भएकोले नेपाल र नेपालीहरुको लागि पनि यो प्रतिष्ठा र गौरवको विषय भएको उनको भनाई छ ।
यो पटकको सागमा धेरै भन्दा धेरै पदक जित्नेगरी नेपालले तयारी गरेको बताउँदै मन्त्री विश्वकर्माले सागमा राम्रो नतिजा आउने दाबी गरे ।
‘सुरुवाती खेलको विजय सुरुवातबाटै नेपालले धेरै पदक जित्ने संकेत मिलेको छ,’ उनले भने।
मन्त्री विश्वकर्माले उद्घाटन समारोहमा देशका ख्याँतिप्राप्त कलाकार, नेपाल प्रहरी, सशस्त्र प्रहरी, नेपाली सेना र विद्यार्थीहरुको विशेष सांस्कृतिक प्रस्तुति हुने समेत बताए ।
यस्तै मन्त्री विश्वकर्माले सागलाई नेपाल भ्रमण वर्ष–२०२० प्रर्वद्धन गर्ने रणनीतिक तयारीको रुपमा पनि लिईएको पनि बताए ।
