साग विशेष : ब्याडमिन्टनले निराश नपार्ने

काठमाडौं । ब्याडमिन्टनले दक्षिण एसियाली खेलकुद (साग) मा धेरै पछि मात्र प्रवेश पायो ।

सागको इतिहास हेर्दा सन् २००४ बाट मात्र ब्याडमिन्टन खेल समावेश गरिएको थियो । अर्थात, सुरुवाती ८ संस्करणसम्म ब्याडमिन्टनलाई सागमा समावेश गरिएन ।

नेपालले भने पाकिस्तानमा भएको नवौं सागपछि निरन्तर रुपमा ब्याडमिन्टनमा सहभागिता जनाउदै आएको छ ।

नेपालले सागमा रजत बाहेक ठुलो उपलब्धि हात पार्न सकेको छैन । तर, नेपालले कुनै पनि संस्करणमा ब्याडमिन्टनमा खाली हात भने फर्कनु परेको छैन ।

तयारी -

घरेलु मैदानमा आयोजना हुने १३ औं सागका लागि ब्याडमिन्टनको तयारी नेपालले पोखरामा गरिरहेको छ ।

करिब २ महिनादेखि निरन्तर प्रशिक्षणमा रहेको खेलाडीले अन्तराष्ट्रिय प्रतियोगितामा समेत सहभागिता जनाए । राम्रा प्रतियोगितामा सहभागि नेपाली खेलाडीले पदक समेत जितेका छन् ।

माल्दिभ्समा भएको यू–२१ दक्षिण एसिया चाम्पियनसिपमा नेपालले २ रजत र ३ कास्य पदक जित्यो । पाकिस्तानमा भएको योनेक्स सनराइज इन्टरनेसनल ब्याडमिन्टन सिरिजमा दिपेश धामी र रत्न जित तामाङको जोडीले पुरुष डबलमा रजत पदक हात पारे ।

पछिल्ला प्रर्दशनले खेलाडीको मनोबल समेत उच्च छ । ब्याडमिन्टनमा नेपालको मुख्य प्रतिद्वन्दी भारत हो । ब्याडमिन्टनको वरियतामा भारतका खेलाडी निकै माथि रहेका छन् । त्यसैले सागमा नेपालले बढीमा रजत पदकको लक्ष्य राखेको छ ।

'भारत विश्व वरियतामा बलियो टिम हो । नेपालको मुख्य चुनौती भारतनै हुनेछ ।’ प्रशिक्षक सुदिप योन्जनले भने, ’श्रीलंका, बंगलादेश, पाकिस्तान हाम्रै स्तरका हुन् ।’

ब्याडमिन्टनका स्पर्धा पोखरामा डिसेम्बर १ देखी ६ सम्म आयोजना हुनेछ ।

पोखरामै खेल हुने भएपछि सोही स्थानमा तयारी समेत गरिएको छ । तर,अभ्यास गर्ने स्थल स्तरीय नभएको प्रशिक्षकको गुनासो छ ।

'अभ्यास गर्ने स्थल सिमेन्टको छ । म्याट बिछ्याएर अभ्यास गरेका छौं ।’ प्रशिक्षक सुदिपले भने, 'यसरी खेल्दा खेलाडीको घुँडामा समस्या देखिन थालेको छ । तर खेलाडीले कुनै आपत्ति नजनाई कडा मेहनत गर्दै अभ्यासमा जुटेका छन् ।’

काठको खेल स्थलमा प्रशिक्षण गरिरहेका खेलाडीले पोखरामा सिमेन्टमा म्याट बिछ्याएर खेल्दा समस्या भएको हो ।

खेलाडीलाई निरन्तर अभ्यासमा मात्र राख्दा अल्छी लाग्ने भएका कारण उनीहरुलाई रिफ्रेस गराउन बेला मौकामा पोखरा गुमाउने गरेको सुदिपले जानकारी गराए ।

'खेलाडी लामो समयदेखि क्याम्पमा छन् । रिफ्रेस गराउन घुमाउने तथा अन्य खेल खेलाउने गरेका छौं ।’ सुदिपले थपे, ’हाँस्य कलाकार सन्दीप क्षेत्रीलाई ल्याएर एक घण्टाको प्रेरणादायी कक्षा समेत गराएका छौं ।’

लक्ष्य -

घरेलु भूमिमा आयोजना हुन लागेको सागमा समर्थकलाई निराश नपार्ने लक्ष्यका खेलाडीहरु प्रशिक्षणमा जुटेको प्रशिक्षक सुदिपले प्रष्ट पारे ।

वैदेशिक प्रतियोगितामा समेत सफलता हात पार्दै आएका कारण खेलाडीको मनोबल उच्च रहेको छ ।

प्रिन्स दाहाल, दिपेश धामी, बिष्णु कटुवाल, अमिता गिरि, नङ्गशल तामाङ्ग,प्रफुल महर्जन, सुनिल जोशी लगायतका खेलाडी सागमा पदक दिलाउन सक्ने खेलाडीको रुपमा हेरिएको छ ।

खेलाडीलाई हाल सुदिप योञ्जनको नेतृत्वमा नेपालका ५ प्रशिक्षक सहित एक जापानिज प्रशिक्षक यामा मोटोले प्रशिक्षण दिंदै आएका छन् ।

ब्याडमिन्टनमा ७ स्वर्णका लागि प्रतिस्पर्धा हुनेछ । हरेक विधा (एकल, डबल्स र टिम) मा महिला र पुरुषको प्रतिस्पर्धा हुनेछ । मिक्स डबल्समा एक स्पर्धा मात्र रहेको छ ।

साग खेल्ने नेपाली खेलाडी

पुरुष - रत्नजित तामाङ, दिपेश धामी, बिकास श्रेष्ठ , प्रिन्स दाहाल, नविन श्रेष्ठ, प्रफुल महर्जन, सुनिल जोशी, बिष्णु कटुवाल, जीवन आचार्य र साजन कृष्ण ताम्राकार

महिला - नङ्शल तामाङ, रशिला महर्जन, जेशिका गुरुङ, सिमा राजवंशी, पुजा श्रेष्ठ, अनुमाया राई, अमिता गिरी, सिता राई र निता लम्साल