काठमाडौं । योनेक्स सनराईज नेपाल अन्तराष्ट्रिय च्यालेञ्जको महिला एकलको उपाधिका थाइल्याण्डकी पोर्नतिप बुरानाप्रसेर्तुक र कोरियाकी गा युन पार्कबीच प्रतिस्पर्धा हुने भएको छ ।
दशरथ रङ्गशालाको कभर्डहलमा शनिबार भएको सेमिफाइनलमा पोर्नतिपले जापानकी रिको गुञ्जीलाई २१–१७, २१–१५ ले पराजित गर्दै उपाधि नजिक पुगिन् ।
यस्तै गा युनले जापानकी अकारी नाकाशिजुलाई २१–१८, २१–१९ ले पन्छाउँदै फाइनलमा पोर्नतिपसँगको भेट पक्का गरिन् ।
पुरुष एकलमा भने भियतनामका काव सुओङ्ग फाम भारतका सिरिल बर्मालाई २१–११, २१–१६ ले पराजित गर्दै उपाधि नजिक पुगेका छन् । फाम प्रतियोगितामा छैटौं स्थानमा र बर्मा ७ औं स्थान प्राप्त खेलाडी हुन् ।
अर्को खेलमा प्रतियोगितामा आठौं स्थानका अदुलराच नामकुल पाँचौ स्थानका क्यानडाका झिआउदोङ्ग सेङ्गलाई २१–१४, २१–१९ ले पन्छाउँदै फाईनलमा फामसंगको भिडन्त पक्का गरेका छन् ।
महिला युगल तर्फ अष्ट्रेलियाका सेताना मापासा र ग्रोन्या सोमरभिल्ले तथा भारतका मनिषा के. र रुतापर्ना पान्डाको जोडी उपाधीका लागि भिड्ने भएका छन् । प्रतियोगितामा पहिलो स्थान पाएका सेताना र ग्रोन्याको जोडीले थाईल्याण्डका रुईथाईचानोक लैसुवान र सुपामार्त मिङ्गचुवाको जोडीलाई १८–२१, २१–१६, २१–१३ ले तथा चौथो स्थानका मनिषा र रुतापर्नाको जोडीले थाईल्याण्डकै चासिनी कोरेपाप र क्वान्छानोक सुजाईप्प्रापरतको जोडीलाई १७–२१, २३–२१, २१–१७ ले पराजित गर्दै फाईनल प्रवेश गरेका हुन् ।
पुरुष युगल तर्फ भने भारतका खेलाडीहरुले उपाधीका लागि प्रतिस्पर्धा गर्ने भएका छन् । पहिलो सेमिफाईनलमा भारतका अत्री मनु र रेड्डी बि. सुमिथ को जोडीले कोरियाका किम दोक्योङ्ग र किम सा राङ्गलाई १८–२१, २१–१९, २१–१९ ले तथा भारतकै एम. आर. अर्जून र ध्रुव कपिलाको जोडीले कोरियाका ना सुङ्ग सिउङ्ग र वाङ्ग चानको जोडीलाई २१–१६, २१–१६ को समान अन्तरले पराजित गर्दै फाईनल यात्र तय गरेका हुन् ।
मिक्स युगल तर्फ थाईल्याण्डका सुर्पाक जोमखो र सुपिसारा पाउसाम्प्रानको जोडी कोरियाका ना सुङ्ग सिउङ्ग र किम मिन जीको जोडीलाई २५–२३, २१–१०ले पराजित गर्दै फाईनल प्रवेश गरे । यस्तै फाईनल प्रवेश गर्ने अर्को जोडीमा कोरियाका किम सा राङ्ग र किम हा नाको जोडी रहे । राङ्ग र नाको जोडीले भारतका रेड्डी बि. सुमिथ र कुहो गार्गको जोडीलाई १५–२१, २२–२०, २१–१७ ले पराजित गरे ।
