काठमाडौं । योनेक्स सनराइज नेपाल इन्टरनेसनल च्यालेन्ज ब्याडमिन्टन प्रतियोगिता बुधबारबाट सुरु हुने भएको छ ।
नेपाल ब्याडमिन्टन संघले आइतबार पत्रकार सम्मेलन गर्दै नेपाल इन्टरनेसनल च्यालेन्ज कात्तिक २७ गतेबाट मंसिर १ गतेसम्म हुने जनाएको छ ।
प्रतियोगितामा २१ राष्ट्रका १ सय ४९ खेलाडीले प्रतिस्पर्धा गर्ने छन् । प्रतियोगितामा नेपालसहित भारत, जापान, थाइल्याण्ड, कोरिया, रुस, बंगलादेश, अमेरिका, क्यानडा, माल्दिभ्स, युक्रेन, भियतनाम, मंगोलिया, अष्ट्रेलिया, मलेसिया, टर्की, इन्डोनेसिया, भुटान, पाकिस्तान, इरान र इंग्ल्याण्डका खेलाडीको सहभागिता रहने छ ।
प्रतियोगितामा पुरुष र महिला एकल, युगल तथा मिश्रित युगल गरि पाँच इभेन्ट्समा प्रतिस्पर्धा हुनेछ । पुरुष एकलमा ६७, महिला एकलमा ३८, पुरुष युगलमा २१, महिला युगलमा १७ तथा मिश्रित युगलमा २२ खेलाडीले दर्ता गराएको संघले जनाएको छ ।
प्रतियोगितामा पुरुष र महिला एकलको विजेताले १ हजार ८७५ युएस डलर, उपविजेताले ९५० डलर, तेस्रोले ३६२.५० डलर, क्वाटरफाइनलमा पुग्नेले १५९ डलर र अन्तिम १६ मा पुग्नेले ८७.५० डलर पाउने छन् ।
पुरुष युगल, महिला युगल र मिश्रित युगलको विजेताले १ हजार ९७५ डलर, उपविजेताले ९५० डलर, तेस्रोले ३५० डलर, क्वाटरफाइनलमा पुग्नेले १८१.२५ डलर र अन्तिम १६ मा पुग्नेले ९३.७५ डलर पाउने छन् ।
करिब ६८ लाख ७५ हजार खर्च लाग्ने प्रतियोगितामा राष्ट्रिय खेलकुद परिषदले २० लाख,योनेक्स सनराइजले ६ हजार डलर र ब्याडमिन्टन एसियाले ११ हजार डलर सहयोग गरेको छ । बाँकी रकम संघ आफैले जुटाएको बताईएको छ ।
