काठमाडौं । सन् २०१६ मा बार्हौं दक्षिण एसियाली खेलकुद प्रतियोगिता (साग) भारतको सिलोङ र गुवाहाटीमा भएको थियो ।
त्यो समय भुकम्पबाट तंग्रिन लागेको नेपाली खेलकुदलाई भारतीय नाकाबन्दीले पिरोलेको थियो । जसका कारण सागको तयारी फितलोनै भयो ।
जब भारतको सिलोङ र गुवाहाटीका खेलहरु सुरु भए, नेपालको प्रर्दशन र नतिजा कमजोर रह्यो ।
भारत र श्रीलंकाले पदक तालिकामा एकपछि अर्को बाजी मारिरहदाँ नेपाली खेलाडी मुखदर्शक बनिरहेका थिए ।
तीन दिनसम्म समेत नेपाल स्वर्ण विहिन थियो ।
चौथो दिन भने नेपाली खेलकुदले पहिलो स्वर्ण भेट्टायो ।
१६ वर्षकी उसु खेलाडी निमा घर्तिमगरले नेपाललाई पहिलो स्वर्ण दिलाईन् ।
उनले उसुको थाउलोको नान् छ्वानमा स्वर्ण जितेकी थिईन् ।
त्यसपछि उनै निमा घरेलु खेलकुदकी हटकेक बनिन् । सानै उमेर सागमा स्वर्ण हात पार्दै उनले राष्ट्रिय गौरवलाई उचो परिन् ।
भारतीय संस्करणको करिब तीन बर्षपछि नेपाल १३ औ सागको तयारीमा छ ।
व्यवस्थापन र सहभागीताका आधारमा सफल आयोजनासंगै धेरै पदक जित्नुपर्ने चुनौती नेपाललाई छ ।
अघिल्लो संस्करणमा नेपाललाई स्वर्ण जिताएकी निमाले घरेलु मैदानमा हुन लागेको सागलाई कसरी लिएकी छिन् त ?
‘पक्कै पनि रजत र काँस्यमा त झुन्डिएर बस्दिन । यो सागमा पनि लक्ष्य स्वर्णनै हुनेछ ।’ उनले खेलपाटीसंग भनिन् ।
उनले आसन्न १३ औ सागमा समेत स्वर्ण जितेर ईतिहास दोहर्याउने लक्ष्य लिएकी छिन् ।
सागलाई लक्षित गरेर उसुले जेठबाट प्रारम्भिक प्रशिक्षण सुरु गर्यो । भदौबाट मात्र बन्द प्रशिक्षणको सुरुवात भएको हो ।
१३ औं सागको तयारी राम्रो भएको निमा बताउछिन् ।
‘प्रशिक्षणमा उत्कृष्ट दिइरहेका छौ । प्रशिक्षकले पनि उत्कृष्ट रुपमा प्रशिक्षित गराईरहनुभएको छ । अब नतिजाको पखाईमा छौ ।’ उनले भनिन् ।
१३ औं सागको बन्द प्रशिक्षणमा रहेका ११ खेलाडी गत महिना विश्व उसु च्याम्पियनसिप खेल्न चीन पुगेका थिए ।
चीनको संघाई शहरमा भएको विश्व उसु च्याम्पियनसिपको तुलनामा खेलमा धेरै सुधार भएको निमा बताउँछिन् ।
‘संघाईमा वल्र्ड च्याम्पियनसिप खेल्न गएका थियौ । च्याम्पियनसिप भन्दा अहिले सुधार भएको छ । अझै गल्तीलाई सुधार्नु पर्नेछ ।’ उनले भनिन्, ‘सोही अनुसार प्रशिक्षकले मलाई तयार गरिरहनु भएको छ ।’
स्वर्णधारी निमा गल्तीलाई सुधार गर्न धेरै समय लाग्ने बताउँदै कमजोरीलाई केन्द्रित गरेर तयारी अघि बढाईरहेको बताउँछिन् ।
उनले १३ औ सागमा समेत आफ्नो प्रतिस्पर्धा भारतीय खेलाडी हुने बताईन् ।
‘अहिल्यै भन्न सकिन्न तर अघिल्लो सागको नतिजा हेर्दा भारतीय खेलाडीसंग कडा प्रतिस्पर्धा हुन्छ जस्तो लाग्छ ।’ निमा भन्छिन् ।
उनले १३ औं सागमा राम्रो नतिजा ल्याउने बताउँदै उसुबाट सकारात्मक नतिजा आउने दाबी गरिन् ।
‘तयारी हेर्दा नतिजा राम्रो आउछ जस्तो लाग्छ । टिमको तयारी उत्कृष्ट छ । सागमा राम्रो नतिजा देखाउँछौ ।’ निमा आत्मविश्वासी देखिन्छिन् ।
