काठमाडौं । नेपाल ओलम्पिक कमिटि (एनओसी) को शनिबार हुने निर्वाचनमा सरकारी पक्ष उमेशलाल श्रेष्ठको पक्षमा देखिएको छ ।
युवा तथा खेलकुद मन्त्री जगतबहादुर विश्वकर्मा र राष्ट्रिय खेलकुद परिषद्का सदस्य सचिव रमेश सिलवालले एनओसीको निर्वाचनमा उमेशलालको पक्षको लबिङ तिव्र पारेका छन् ।
खेलकुदमन्त्री विश्वकर्माले सरकारको उम्मेदवार उमेशलाल रहेको प्रष्ट पार्दै निर्वाचनमा सहयोग गर्न संघहरुका प्रतिनिधिसंग आग्रह गरेका छन् ।
शुक्रबार बिहान चारवटा खेलकुद संघका प्रतिनिधिलाई मन्त्री क्वार्टर पुल्चोक बोलाएर खेलकुदमन्त्री विश्वकर्माले एनओसी निर्वाचनमा सरकारको धारणा प्रष्ट पारेका हुन् ।
‘उमेशलाल सरकारको आधिकारिक उम्मेदवार हो । तपाईहरुको सहयोगको आश गरेका छौँ ।’ खेलकुद मन्त्रीको भनाई उद्वित गर्दै एक प्रतिनिधिले खेलपाटीसंग भने ।
मन्त्री विश्वकर्माले ओलम्पिक कमिटि र सरकारको विवादको लामो उदाहरण प्रस्तुत गर्दै उमेशलाल नेतृत्व आए काम गर्न सहज हुने उल्लेख गरेका थिए ।
भेटमा आर्चरीका रमेश सिवाकोटी, फेन्सिङका शुनिल श्रेष्ठ, ब्याटमिन्टनका रामजी बहादुर श्रेष्ठ र र्याफटिङबाट राजिव श्रेष्ठ सहभागी थिए ।
छलफलमा राखेप उपाध्यक्ष तथा एथ्लेटिक्सका प्रतिनिधि पिताम्बर तिम्सिना, कुस्ती संघका प्रतिनिधि तथा मुस्लिम आयोगका अध्यक्ष समिममिया अन्सारी र राखेप सदस्य सचिव सिलवाल समेत उपस्थित थिए ।
अदालतको परेको मुद्वाका कारण भदौ २० गतेको एनओसी निर्वाचन स्थगित भएको थियो । अदालतले भदौ २२ गते भएको सर्वपक्षिय छलफलपछि रिट निवेदन खारेज गर्दै निर्वाचनका लागि बाटो खोलिदिएको थियो ।
लगत्तै ओलम्पिक कमिटिले अन्तराष्ट्रिय ओलम्पिक कमिटि (आईओसी) र एसियन ओलम्पिक कमिटि (एनओसी)संग अनुमती माग्दै भदौ २८ गते निर्वाचनको नयाँ मिति सार्वजनीक गरेको थियो ।
ओलम्पिक कमिटिको नयाँ मिति सार्वजनिक भए लगत्तै सरकार उमेशलालको पक्षमा उत्रिएको छ ।
एनओसीको नयाँ नेतृत्वकालागि वर्तमान अध्यक्ष जीवनराम श्रेष्ठ र पूर्व उपाध्यक्ष उमेशलाल श्रेष्ठ चुनावी प्रतिस्पर्धामा छन् । जीवनरामले निलेन्द्रराज श्रेष्ठ र उमेशलालले पुरेन्द्रबिक्रम लाखेलाई महासचिवको प्यानलको रुपमा समावेश गर्दै उम्मेदवारी दर्ता गराएका थिए ।
तत्कालिन एमालेका दुई गुटको भिडन्त
तत्कालिन एमाले (अहिलेको नेकपामा) मुख्य दुई गुट छन् । संस्थापन पक्षको नेतृत्व केपी अोलीले गर्छन् । प्रतिपक्षमा माधव नेपाल समूह छ । पार्टीभित्रका दुई गुटको संघर्ष एनओसीको नयाँ निर्वाचनमा देखिदैछ । संस्थापन पक्षको नेतृत्व उमेशलाल र प्रतिपक्षको नेतृत्व जीवनरामले गरेका छन् ।
पार्टी र सरकारको नेतृत्वमा आएपछि प्रधानमन्त्री केपी ओलीले खेलकुदमा बिशेष चासो राख्दै आएका छन् । सोही अनुसार पार्टी भित्रका विश्वासपात्र जगत विश्वकर्मालाई खेलकुद मन्त्री बनाएका थिए ।
लगत्तै राखेपको सदस्य सचिवमा ‘किचेन क्याबिनेट’ का रमेश सिलवाललाई नियुक्त गरेका थिए । अब ओलीको नजर ओलम्पिक कमिटिको नेतृत्वमा छ । सोही अनुसार उनले उमेशलाललाई एनओसीको नेतृत्वमा स्थापित गर्न खेलकुद मन्त्रीलाई निर्देशन दिएको नेकपाकै उच्च स्रोत बताउँछ ।
सोही अनुसार खेलकुद मन्त्री विश्वकर्मा सहित सदस्य सचिव सिलवालले उमेशलालको पक्षमा लबिङलाई तिव्र पारेका छन् ।
पिताम्बरको लाईन चेन्ज
एनओसीको निर्वाचन सुरु भए लगत्तै जीवनरामको पक्षमा खुलेर लागेका राखेप उपाध्यक्ष पिताम्बर तिम्सिनाले लाईन ‘चेन्ज’ गरेका छन् । भावी नेतृत्वमा स्थापित गराउने बाचा सहित जीवनरामले पिताम्बरलाई एनओसी निर्वाचनमा सघाउन आग्रह गरेका थिए । सोही अनुसार पिताम्बरले समेत सुरुवाती दिनमा जीवनरामलाई खुलेर साथ दिएका थिए ।
तर पार्टीको संस्थापन पक्षको चर्को दबाबपछि पिताम्बरले जीवनरामको साथ छाडेका छन् । पिताम्बर अहिले उमेशलाललाई जिताउन संघ संस्थाका प्रतिनिधिसंग भोट माग्दै हिडेका छन् । उनी पार्टी भित्र संस्थापन पक्षका रुपमा चिनिन्छन् ।
अरु काे काे भिड्दै ?
नयाँ नेतृत्वमा पुरानै प्रतिद्वन्दी जीवराम र उमेशलाल दोहरिदा पाँच उपाध्यक्षका लागि ८ जनाले उम्मेदवारी छ। उपाध्यक्षमा ज्योति राणा, तेज बहादुर गुरुङ, पुष्प दास श्रेष्ठ, अशोक रत्न बज्राचार्य, सुनिल कुमार श्रेष्ठ, चतुरानन्द राज बैद्य, राजिब श्रेष्ठ र समिम मिया अन्सारीले उम्मेदवारी दिएका छन् ।
यस्तै १ महासचिबका लागि पुरेन्द्र बिक्रम लाखे र निलेन्द्र राज श्रेष्ठले उम्मेदवारी दिएका छन् ।
उप-महासचिबमा पिताम्बर तिम्सिना र कोषाध्यक्षमा रतन कुमार टन्डन निर्विरोध भएका छन् । उप-महासचिब र कोषाध्यक्षमा एक एक जनाको मात्र उम्मेदवारी परेको हो ।
३ सचिबका लागि केशब कुमार बिष्ट, रामजी श्रेष्ठ, दिपक हर्ष वज्राचार्य र तुलसी थापाले उम्मेदवारी दिएका छन् ।
त्यस्तै ७ सदस्यका लागि ८ जनाले उम्मेदवारी दिएका छन् । सदस्यका लागि रमेश प्रसाद सिवाकोटी, राम अवाले, प्रकाश शमशेर राणा, गोपाल सुन्दर लाल कक्षपति, टाँसी घले, होम बहादुर दोङ, दिर्ग बहादुर केसी र मनोरंजन रमण शर्माले उम्मेदवारी दिएका छन् ।
-1732413260.jpg)
