ओलम्पिक चुनाव – उम्मेदवारी दर्ता मंगलबार

काठमाडौं । नेपाल ओलम्पिक कमिटि (एनओसी)को नयाँ नेतृत्वका लागि हुने निर्वाचनको कार्य तालिका सार्वजनिक भएको छ ।

लोकभक्त राणाको संयोजकत्वको निर्वाचन समितिले भदौ २० गते हुने निर्वाचनको कार्यतालिका सार्वजनिक गरेको हो ।

तालिका अनुसार भदौ ८ गते आईतबार मतदाता नामावली प्रकाशनको कार्यतालिका रहेको थियो । त्यस्तै भदौ ९ गते आज (सोमबार) मतदाता नामावली दावी विरोधको समय रहेको छ । त्यसका लागि बिहान १० बजेबाट दिउँसो २ सम्मको समय छुट्याईएको छ । मतदाता नामावली दाबी विरोध निर्णय आजै दिउँसो ३ बजे र अन्तिम मतदाता नामावली प्रकाशन अपरान्ह ४ बजे हुनेछ ।

यस्तै, उम्मेदवारी दर्ता भदौ १० गते बिहान १० देखि दिउँसो २ बजेसम्म छुट्याईएको छ । सोही दिन दिउँसो ३ बजे उम्मेदवारको प्रथम नामावली प्रकाशन गरिनेछ ।

यस्तै उम्मेदवारी उपर दाबी विरोध गर्न भदौ ११ गते बिहान १० बजेदेखि २ बजेसम्मको समयसिमा निर्धारण गरिएको छ । सोही दिन अपरान्ह ४ बजे उम्मेदवारी दावी विरोध उपर निर्णय हुनेछ ।

भदौ १२ गते उम्मेदवारी फिर्ताको समय राखिएको छ । बिहान १० देखि दिउँसो २ बजेसम्म उम्मेदवारी फिर्ता लिन चाहने उम्मेदवारी नाम फिर्ता लिन सक्नेछन् । सोही दिन दिउँसो ३ बजे उम्मेदवारको अन्तिम नामावली प्रकाशन गरिनेछ ।

निर्वाचन समितिले भदौ २० गते बिहान ९ बजेदेखि दिउँसो २ बजेसम्म मतदानको समय तोकेको छ ।

मतगणना र मत परिणामको घोषणा भने मतगणना समाप्त भए पश्चात निर्वाचन आयोगले तोके बमोजिम हुनेछ ।

निर्वाचन सम्पन्न गर्न एनओसीको बोर्ड बैठकले लोकभक्त राणाको संयोजकत्वमा तीन सदस्यीय निर्वाचन समिति गठन गरेको छ । समितिमा राधिका खतिवडा र भिम थापा रहेका छन् ।

१९ सदस्यीय कार्यसमितिका लागि निर्वाचन

एनओसीको संशोधित विधान अनुसार १९ सदस्यीय कार्यसमितिका लागि निर्वाचन हुनेछ । भदौ २० गतेको साधारण सभाले अध्यक्ष सहित ५ उपाध्यक्ष, १ महासचिव, १ सह महासचिव, १ कोषाध्यक्ष, ३ सचिव र ७ सदस्य चयन गर्नेछ । बैठकले कुनैपनि पुर्व अध्यक्षलाई मानार्थ अध्यक्षमा मनोनित गर्न पाउने प्रावधान समावेश गरेको छ ।

एनओसीको चुनावमा २७ वटा संघले भाग लिदैछन् । गल्फले कान्छो सदस्यको रुपमा पहिलो पटक निर्वाचनमा सहभागीता जनाउँदै छ ।