काठमाडौं । राष्ट्रिय खेलकुद परिषद्का सदस्य सचिव रमेशकुमार सिलवालले नेपाल विश्वविद्यालय खेलकुद संघलाई युनिभर्सिटी अन्तर्राष्ट्रिय क्रिकेट प्रतियोगिता आयोजनाका लागि पहल गर्न सुझाब दिएका छन् ।
नेपाल विश्वविद्यालय खेलकुद संघले उनकै सम्मानमा शनिबार आयोजना गरेको बधाइ तथा शुभकामना कार्यक्रममा सदस्य–सचिव सिलवालले सो सुझाब दिएका हुन् ।
‘तत्काललाई दक्षिण एसियाकै टिमलाई बोलाएर भए पनि सुरुआत गुर्नस । यसले राम्रै सन्देश जान्छ,’ सदस्य–सचिव सिलवालले भने, ‘परिषद्ले पनि सक्दो सहयोग गर्छ । यसलाई कसरी अगाडि बढाउन सकिन्छ आउनुस बसेर छलफल गरौं । हामीले सुरु गरेको देखेर अरुले पनि सुरुआत गर्न सक्छन् ।’
कार्यक्रममा संघका अध्यक्ष प्रदीपराज जोशीले सदस्य–सचिव सिलवाललाई मायाको चिनो प्रदान गरेका थिए भने महासचिव पूर्णसिंह बोहराले संघ र अन्तर्राष्ट्रिय विश्वविद्यालय संघका गतिविधि बारे प्रकाश पारेका थिए ।
एक छुट्टै कार्यक्रममा एन प्याब्सनले सदस्य–सचिव सिलवाललाई प्रशंसा पत्र प्रदान गरी कार्यकाल सफलताका लागि शुभकामना दिएका थिए ।
-1732413260.jpg)
