एजेन्सी । साविकको विजेता तथा सर्बियन नोभाक जोकोभिक र स्विस खेलाडी रोजर फेडेरर विम्बल्डन टेनिसको क्वाटरफाइनलमा प्रवेश गरेका छन् ।
सोमबार राति भएको अन्तिम १६ को खेलमा जोकोभिकले फ्रान्सका उगो हुमबर्टलाई ६-३,६-२ र ६-३ को सेटमा पराजित गरे ।
विश्व नम्बर एक समेत रहेका जोकोभिकले अब डेभिड गोफिनसँग खेल्नेछ ।
यस्तै दोस्रो वरियताका फेडेररले इटालीका माटियो बेरेट्टीनीलाई ६-१,६-२ र ६-२ को सेटमा पराजित गरे । योसँगै फेडेरर कीर्तिमानी १७ पटक विम्बल्डनको क्वाटरफाइनलमा प्रवेश गरेका छन् ।
महिलातर्फ शीर्ष वरियताकी एश्ले बर्टी अन्तिम १६ बाट बाहिरिएकी छिन् । उनी अमेरिकाकी एलिसन रिस्केसँग ३-६,६-२ र ६-३ को सेटमा पराजित भईन् ।
बेलायती महिला खेलाडी जोहन्ना कोन्टा भने क्वाटरफाइनलमा पुगेकी छिन् ।
