प्रधानमन्त्रीको ‘सिग्नल’ पर्खदै खेलकुदमन्त्री
काठमाडौं । राष्ट्रिय खेलकुद परिषद्को सदस्य सचिव नियुक्तिमा सरकारले ढिलाई गरेको छ । आसन्न १३ औ दक्षिण एसियाली खेलकुद प्रतियोगिता साग आउन ५ महिना समेत बाँकी नरहेको अवस्थामा खेलकुदको कार्यकारी निकाय नेतृत्व विहीन बनेकाे छ ।
सदस्य सचिव केशवकुमार विष्ट असार ९ गते चार बर्षे कार्यकाल पुरा गरि बिदा भएपनि सरकारले नयाँ सदस्य सचिव नियुक्त गर्न सकेको छैन ।
खेलकुदमा पठाउने व्यक्तिका बिषयमा पाटीका शीर्ष नेताबीच निर्णायक छलफल हुन नसक्दा सदस्य सचिव नियुक्ति प्रक्रियामा ढिलाई भएको हो ।
सदस्य सचिव विष्टलाई तत्कालिन खेलकुद मन्त्री पुरुषोत्तम न्यौपानेले २०७२ साल असार ९ गते सदस्य सचिवमा नियुक्त गरेका थिए । असार ९ गतेबाट राखेपको केन्द्रिय कार्यालय जान छाडेका सदस्य सचिव विष्ट पुन सोही पदमा दोहरिनका लागि आन्तरिक लबिङमा छन् ।
यता युवा तथा खेलकुद मन्त्री जगत विश्वकर्मा भने सदस्य सचिव नियुक्तिमा प्रधानमन्त्री केपी शर्मा ओलीको ‘सिग्नल’ पर्खिएर बसेका छन् । शीर्ष तहका नेताबीच भएको समझदारीलाई कार्यान्वयन गर्ने सोचमा खेलकुद मन्त्री देखिएका छन् ।
‘खेलकुदमा पठाउने ब्यक्तिका बिषयमा शीर्ष नेता परामर्शमा हुनुहुन्छ । सोही कारण नियुक्ती प्रक्रियाले समय लिएको हो ।’ खेलकुद मन्त्रालयका एक अधिकारीले भने, ‘प्रधानमन्त्रीबाट नाम आउने बित्तिकै राखेप सदस्य सचिव नियुक्ति हुनेछ ।’
सत्तारुढ पाटी नेकपामा सदस्य सचिव बन्न दर्जन बढी उम्मेदवार देखिएका छन् । सदस्य सचिवका लागि तत्कालिन माओवादीको तर्फबाट दानबहादुर तामाङ र शिव कोईराला तथा तत्कालिन एमालेबाट रमेश सिलवाल, केशव विष्ट र पिताम्बर तिम्सिनाले जोड गरिरहेका छन् ।
प्रधानमन्त्री ओलीले नयाँ सदस्य सचिव नियुक्तिमा केही व्यक्तिलाई बालुवाटार बोलाएर छलफल समेत गरेका छन् ।
यता अर्का अध्यक्ष दाहालले आफ्नो तर्फबाट सदस्य सचिवका आकांक्षीको नाम प्रधानमन्त्री ओलीलाई सिफारिस गरिसकेका छन् । नेकपाको भातृ संगठन नेपाल खेलकुद महासंघले समेत संगठनको सिफारिस मात्र नाम छनोट गर्न भन्दै नेतृत्वमाथि दबाब दिईरहेका छन् ।
युवा तथा खेलकुद मन्त्रालय भने शीर्ष नेताबीच हुने सहमतीलाई कार्यान्वयन गर्ने तयारीमा छ ।
‘मन्त्रीको कुनै अडान छैन । सबै नामहरु छलफलमै छ । टुङ्गो लागेको अवस्था छैन । तर शीर्ष नेताको सहमतीबाट आउने ब्यक्तिलाई जिम्मेवारी दिने पक्षमा मन्त्री हुनुहुन्छ ।’ मन्त्रालयका ती अधिकारी बताउँछन् ।
