काठमाडौं । आदर्श विद्या मन्दिर (एभीएम) ले सत्यनारायण स्मृति राष्ट्रिय अन्तरविद्यालय टेबलटेनिस प्रतियोगिताको टिम इभेन्टमा दुई स्वर्ण पदक जितेको छ । एभीएमले ब्वाइज तथा गल्स दुबैमा स्वर्ण हात पारे ।
शनिबार भएको ब्वाइजको फाइनलमा एभीएमले युरो किड्सलाई ३-१ ले पराजित गर्यो । सुनाखरी धरान र पब्लिक एकेडेमी तेस्रो भयो । त्यस्तै गल्समा एभीएमले प्रभातलाई ३-० ले पराजित गर्यो । ब्लु बर्ड र बिडिएस तेस्रो भयो ।
यू-१० ब्वाइजको स्वर्ण उज्वल मानन्धरले जिते । यस्तै कृष्ण महराले रजत तथा आशिष भट्टराई र तोरण सेढाईले कास्य पाए । गल्सतर्फ शुभश्री श्रेष्ठले स्वर्ण जित्दा क्यारिना सुवालले रजत र नर्मदा खाइतु र आस्मा पहरीले कास्य जिते ।
यू-१२ ब्वाइजतर्फ एलन महर्जनले स्वर्ण, आयुष भट्टराईले रजत जित्दा प्रनिशेक भारती र आयुस ताम्राकारले कास्य जिते । गल्सतर्फ बिएन्का राईले स्वर्ण, प्रदिपा सुवालले रजत र बिनिसा डंगोल र सृष्टिका लिबीले कास्य जिते ।
यू-१४ ब्वाइजतर्फ सिद्दार्थ तामाङले स्वर्ण, नवराज राईले रजत र रेहान्त बस्नेत र सरुन श्रेष्ठले कास्य जिते ।
गल्सतर्फ इभाना थापा मगर र दिया देउलाले फाइनल खेल्ने छिन् । इना डंगोल र आरती सुवालले कास्य जितेकी छिन् ।
