सेमिफाइनलमै फेडेरर र नाडाल भिड्ने

एजेन्सी । फ्रेन्च ओपन टेनिसको सेमिफाइनलमा स्विस रोजर फेडेरर र स्पेनिस राफायल नाडालबीच प्रतिस्पर्धा हुने भएको छ ।

पेरिसमा मंगलबार भएको क्वाटरफाइनलमा फेडेररले आफ्नै देशका स्टान वावरिन्कालाई पराजित गर्दै नाडालसंगको भेट पक्का गरे । तेस्रो वरियताका फेडेररले वावरिन्कालाई ७-६(७-४),४-६, ७-६ (७-५) र ६-४ को सेटमा पराजित गरे ।

यसअघि दोस्रो वरियताका नाडालले क्वाटरफाइनलमा जापानका केई निशिकोरीको चुनौतो पाखा लगाए । साविकको विजेता  समेत रहेका नाडालले निशिकोरीलाई ६-१,६-१ र ६-३ को सेटमा पराजित गरे ।

महिलातर्फ बेलायतकी जोहन्ना कोन्टाले सेमिफाइनलको यात्रा तय गरिन्  । कोन्टाले अमेरिकी स्लोअनि स्टेफेन्सलाई ६-१ र ६-४ को सेटमा पराजित गरिन् ।

योसंगै कोन्टाले सन् १९८३ पछि फ्रेन्च ओपनको सेमिफाइनल पुग्ने पहिलो बेलायती महिला खेलाडी बनिन् ।