काठमाडौं । विश्वकै सर्वाधिक उचाईमा आयोजना हुने तेन्जिङ हिलारी एभरेष्ट म्याराथन अन्तर्गत पुरुषतर्फको उपाधि सुमन कुलुङले जितेका छन् ।
बुधबार भएको म्याराथनमा सोलुखुम्बुका सुमनले निर्धाारित दुरी ३ घण्टा ४७ मिनेट १६ सेकेन्डमा पूरा गर्दै उपाधि जितेका हुन् । सुमनले दोस्रो पटक एभरेष्ट म्याराथनको उपाधि जितेका हुन् ।
दोस्रो भएका कपिलदर बुढाले निर्धारित दुरी ३ घण्टा ३६ मिनेट १० सेकेन्डमा पुरा गरे । यस्तै राम कुमार राज भण्डारीले ३ घण्टा ५८ मिनेटमा पुरा गर्दै तेस्रो भए ।
उपाधिसंगै सुमनले २ लाख नगद प्राप्त गरे । दोस्रो भएका कपिलले १ लाख र तेस्रो भएका राम कुमारले ७५ हजार प्राप्त गरे ।
महिलातर्फको उपाधि सुनमाया बुढाले जितिन् । सुनमायाले निर्धारित दुरी ५ घण्टा ३ मिनेट ४ सेकेण्डमा पुरा गरिन् । उपाधिसंगै उनले १ लाख प्राप्त गरिन् ।
दोस्रो भएकी रोजिना भण्डारीले निर्धारित दुरी ५ घण्टा २४ मिनेट १२ सेकेण्डमा पुरा गरिन् । यस्तै हुमि बुढा मगरले ५ घण्टा २९ मिनेट १५ सेकेण्डमा पुरा गरेर तेस्रो स्थान हासिल गरिन् । दोस्रो भएकी रोजिनाले ७५ हजार र हुमिले ५० हजार प्राप्त गरिन् ।
सर्वोच्च शिखर सगरमाथाको आधार शिबिरबाट सुरु भएर म्याराथन नाम्चे बजारमा आएर सकिएको थियो ।
हिमालय एक्सपीडीसन्सले आयोजना गरेको प्रतियोगिता अन्तर्गत हाफ म्याराथनको उपाधि बेलायतका एलेक्सजेन्डर विलियमले जिते । उनले निर्धारित दुरी ३ घण्टा ८ मिनेटमा पुरा गरे ।
यस्तै ब्राजिलका कार्लोस रोचाले ३ घण्टा ४२ मिनेट ५० सेकेण्डमा पुरा गर्दै दोस्रो स्थान हासिल गरे । ब्राजिलका भारतका जेरोमीले ३ घण्टा ४४ मिनेट ५५ सेकेण्डमा दौड पुरा गर्दै तेस्रो भए ।
हाफ म्याराथनतर्फको विजेताले ५० हजार, दोस्रोले ३५ हजार र तेस्रोले २५ हजार प्राप्त गरे ।
अल्ट्रा म्याराथनको उपाधि किरण कुलुङले जिते । उनले ७ घण्टा १४ मिनेट १० सेकेण्डमा दौड पुरा गरे । यस्तै अर्जुन कुलुङ राईले दोस्रो र पूर्ण तामाङले तेस्रो स्थान हासिल गरे ।
अल्ट्रा दौडको विजेताले १ लाख, दोस्रोले ७५ हजार र तेस्रोले ५० हजार प्राप्त गरे ।
विदेशी विधातर्फ भारतका सोनाम फुनटोस्क पहिलो, लिथुनियाका रीमास जभिसुस दोस्रो र भारतका अमित चौहान तेस्रो भए ।
विदेशी स्पर्धामा शीर्ष तीन स्थान हात पार्ने खेलाडीले क्रमश ५०,३५ र २५ हजार प्राप्त गरे ।
