कान्तिपुर हाफ म्याराथन जेठ ११ गते

काठमाडौं । नवौं संस्करणको कान्तिपुर हाफ म्याराथन अर्को साता आयोजना हुने भएको छ । आयोजक कान्तिपुर पब्लिकेशन्स प्रालिले शुक्रबार पत्रकार सम्मेलन गर्दै आठौं संस्करणको हाफ म्याराथन जेठ ११ गते हुने जानकारी गराएको छ ।

नेपाल एथ्लेटिक्स सघंको प्राविधिक सहयोगमा हुने हाफ म्याराथन २१ दशमलब १ किलोमिटरको हुनेछ । हाफ म्याराथनसंगै ३ किमिको ह्विल चेयर दौड र ५ किमिको कर्पोरेट–मिडिया दौड समेत हुने आयोजकले जनाएको छ ।

हाफ म्यारथन, ह्विल चेयर र कर्पोरेट–मिडिया गरी करिब ३ हजार महिला तथा पुरुष खेलाडीले सहभागिता जनाउने प्रतियोगिता संयोजक बिक्रम जंग थापाले जानकारी गराए ।

सिटिजन्स बैंकको मुख्य प्रायोजनमा हुने हाफ म्याराथनतर्फ महिला र पुरुष दुवै स्पर्धाका विजेताले हिरोको डुएट स्कुटरसहित समान ५० – ५० हजार पुरस्कार प्राप्त गर्ने छन् । गत बर्ष हरी कुमार रिमाल र कान्छीमाया कोजुले उपाधि जितेका थिए ।

यस्तै उपविजेताले ३० – ३० हजार र तेस्रो हुनेले समान २० – २० हजार प्राप्त गर्ने छन् । यस्तै चौथोले १० – १०, पाँचौले ५ – ५ हजार प्राप्त गर्दा छैटौं हुनेले समान ३ – ३ हजार प्राप्त गर्ने छन् । 

हाफ म्याराथन कान्तिपुर पब्लिकेशन थापाथलीबाट सुरु भई माइतीघर, बबरमहल, नयाँ बानेश्वर, तिनकुने, कोटेश्वर,जडीबुटी, गट्ठाघर, सानोठिमी हुँदै सल्लाघारी चोक पुगेर पुन: कोटेश्वर, तिनकुने, बानेश्वर, बिजुलीबजार, बबरमहल, माइतीघर हुँदै कान्तिपुर पब्लिकेशन आएर सकिने छ ।

ह्विल चेयरतर्फको महिला र पुरुष विजेताले २० – २० हजार, उपविजेताले १० – १० हजार र तेस्रो हुनेले समान ५ – ५ हजार प्राप्त गर्ने छन् । ह्विल चेयर दौड कान्तिपुर पब्लिकेशन थापाथलीबाट सुरु भई माइतीघर मण्डला घुमेर पुन कान्तिपुर पब्लिकेशन आएर सकिने छ ।

कर्पोरेट–मिडिया दौड कान्तिपुर पब्लिकेशन थापाथलीबाट सुरु भई माइतीघर, बबरमहल, नयाँ बानेश्वर हुँदै सिभिल हस्पिटल पुगेर पुन त्यहिँ बाटो फर्केर कान्तिपुर पब्लिकेशन थापाथली आएर टुंगिने छ ।

कर्पोरेट–मिडियातर्फको विजेताले थाइल्याण्डको बैककको ३ रात ४ दिनको प्याकेज प्राप्त गर्दा उपविजेताले २ रात ३ दिनको प्याकेज पाउने छन् । तेस्रोले माउन्टेन फ्लाइटको टिकट प्राप्त गर्ने छन् ।

हाफ म्याराथनमा सहभागिता जनाउन जेठ ८ गतेभित्र कान्तिपुर पब्लिकेशन आएर नाम दर्ता गराईसक्नु पर्नेछ ।

कार्यक्रममा बोल्दै कान्तिपुर पब्लिकेशनका सहायक महाप्रबन्धक महेश स्वाँरले प्रतियोगितालाई भबिष्यमा अन्तराष्ट्रिय स्तरको बनाउने बताए ।

'यस प्रतियोगितालाई हामीले अन्तराष्ट्रिय स्तरमा लैजाने तयारी गरेका छौ । निकट भविष्यमा पुरस्कार रकम वृद्धि गर्दै यसलाई अन्तराष्ट्रिय बनाउने छौं,' स्वाँरले भने ।