एपीएफ र पुलिस सेमिफाइनलमा भिड्ने

दाङ । आठौं राष्ट्रिय खेलकुद अन्तर्गत महिला फुटबलको सेमिफाइनल समिकरण पुरा भएको छ ।

प्रतियोगिताको सेमिफाइनलमा तीन विभागीय टोली एपीएफ क्लब, नेपाली पुलिस क्लब र त्रिभुवन आर्मीले स्थान बनाएको छ । यस्तै प्रदेश ३ ले पनि सेमिफाइनलको यात्रा तय गरेको छ ।

समूह 'क' बाट आर्मी विजेता र एपीएफ उपविजेता बन्यो । 

आइतबार भएको खेलमा आर्मीले प्रदेश ४ लाई ४-० गोल अन्तरले पराजित गर्यो । आर्मीको जितमा हेमा चौधरी, सुस्मिता तामाङ र भुजंगा राईले एक एक गोल गरिन् । प्रदेश ४ कि अनिता हमालले एक आत्मघाती गोल गरिन् ।

जितसंगै आर्मीले १२ अंक जोड्यो । एपीएफले ९ अंक बनायो ।

समूह 'ख' बाट पुलिस विजेता र प्रदेश ३ उपविजेता बन्यो ।

यस समूहमा आइतबार भएको अन्तिम खेलमा प्रदेश ७ ले प्रदेश ५ लाई २-० ले हरायो । प्रदेश ७ का लागि सुरक्षा सिंह र ललिता लावलले एक एक गोल गरिन् ।

अब सेमिफाइनलमा पुलिसले एपीएफसंग खेल्ने छ । यस्तै आर्मीले प्रदेश ३ को सामना गर्ने छ ।