लनटेनिसमा संरक्षक र प्रणव सेमिफाइनलमा

बाँके । आठौ राष्ट्रिय खेलकुद अन्तर्गत लनटेनिस प्रतियोगिताको पुरुष सिंगल्समा एनआरएनका संरक्षकभूषण वज्राचार्य र आर्मीका प्रणव खनाल सेमिफाइनलमा प्रवेश गरेका छन् ।

उनीहरुसंगै प्रदेश ४ का प्रदीप खड्का र एपीएफका सन्तोष खत्री पनि सेमिफाइनलमा पुगे ।

बुटवलमा भइरहेको प्रतियोगितामा संरक्षणले एपीएफ जितेन्द्र परियारलाई ६–४ र ६–० को सेटमा हराए । प्रणवले आर्मीका सम्यकभूषण वज्राचार्यलाई ६–१ र ६–१ र प्रदीपले प्रदेश ४ का नवीन मगरलाई ६–१, २–६ र ६–२ को सेटमा पराजित गरे ।

सन्तोष खत्रीले प्रदेश ५ का भीष्म काउछालाई ६–२ र ६–१ को सेटमा पराजित गरे ।

महिला सिंगल्समा आर्मीकी आइरा रावतले प्रदेश ३ की प्रकृति श्रेष्ठलाई ६–१, ३–६ र ६–० ले पराजित गर्दै सेमिफाईनल यात्रा तय गरिन् । आर्मीकी अभिलाषा विष्टले गण्डकीकी गंगा शर्मालाई ७–६ र ६–२ को सेटमा हराईन् ।

एपीएफकी प्रेरणा कोइरालाले एपीएफकी एनी माथेमालाई ६–२ र ६–२ तथा प्रदेश ३ की रायना शाहले गण्डकी प्रदेशकी श्रीया भट्टराईलाई ६–१ र ६–१ को सेटमा हराउदै अन्तिम ४ मा स्थान पक्का गरे ।